ბრიტანეთში წყვილი ახალშობილი შვილის მკვლელობაში დამნაშავედ ცნეს - "ბავშვი ტყეში, სასტიკ პირობებში ჰყავდათ...": გახმაურებული საქმის დეტალები

ბრიტანეთში კონსტანს მარტენსი და მისი პარტნიორი მარკ გორდონი თავიანთი ახალშობილი ქალიშვილის გარდაცვალების საქმეში დამნაშავედ ცნეს. მედიიც ინფორმაციით, წყვილს 10-წლიანი პატიმრობა ემუქრება.

ყველაფერი 2023 წლის იანვარში მოხდა - ქალი მეხუთე შვილზე იყო ორსულად, დანარჩენი ოთხი ბავშვი სოციალურმა სამსახურმა წაიყვანა, რადგან მშობლებს ისინი არასათანადო პირობებში ჰყავდათ და არასათანადოდ ექცეოდნენ. იმის შიშით, რომ სოციალური სამსახური მეხუთე ბავშვსაც წაიყვანდა კონსტანსი და მარკი გაიქცნენ და ბავშვი ტყეში, ურთულეს პირობებში დაიბადა. დაბადებიდან რამდენიმე დღეში კი გარდაიცვალა.

ახალშობილის ცხედარი წყვილის დაკავებიდან ორ დღეში, ბრაიტონში, ნაგვის პარკში აღმოაჩინეს.

• წყვილი 54 დღის განმავლობაში იმალებოდა მთელი ქვეყნის მასშტაბით – თავს არიდებდნენ მობილური ტელეფონით კომუნიკაციას, არ იყენებდნენ საბანკო ბარათებს.

ისინი ცხოვრობდნენ კარავში, უკიდურეს სიცივეში. ახალშობილს კი მხოლოდ თხელი მაისური ეცვა. სავარაუდოდ, ბავშვი ჰიპოთერმიით გარდაიცვალა ან დაიხრჩო, როდესაც კონსტანსმა ძილში გულზე მიიხუტა.

• სასამართლომ წყვილი დამნაშავედ ცნო უკიდურესი დაუდევრობით ჩადენილ მკვლელობაში. ასევე მართლმსაჯულებისთვის ხელის შეშლაში, ბავშვის დაბადების დამალვასა და ბავშვისადმი სასტიკ მოპყრობაში.

კონსტანს მარტენსი ბრიტანეთის არისტოკრატული წრიდან, გავლენიანი ოჯახიდანაა. სასამართლოზე მან თქვა, რომ ოჯახში მას სამარცხვინოდ თვლიდნენ და "სიცოცხლეს უმწარებდნენ".

არსებული ინფორმაციით, წყვილმა ურთიერთობა ათი წლის წინ დაიწყო. სოციალური სამსახურების დასკვნით, მათი შვილები ცხოვრობდნენ მავნე გარემოში. მარკ გორდონის წარსული (მძიმე დანაშაული – თინეიჯერობისას ჩადენილი სექსუალური ძალადობა აშშ-ში) და წყვილის ფსიქოემოციური მდგომარეობა სერიოზულ რისკად ითვლებოდა.

• კონსტანს მარტენი თვლის, რომ მისი შვილები "სახელმწიფომ მოიპარა“, ხოლო საზოგადოება კი კითხვებს სვამს სოციალური სამსახურების მუშაობის მეთოდებზე, როგორც ძალადობის პრევენციის, ისე ოჯახური დრამების ხელახალი ტრავმატიზაციის მხრივ.

სასამართლომ განაცხადა, რომ წყვილის პირადი ეგოისტური სურვილები და თავდასხმა სახელმწიფო სისტემაზე გახდა უდანაშაულო ბავშვის სიკვდილის მიზეზი.

• ვინ არის კონსტანს მარტენსი?

კონსტანს მარტენი არის ბრიტანეთის ერთ-ერთი ყველაზე ცნობილი და გავლენიანი არისტოკრატული ოჯახიდან. მისი მამა კრისტოფერ მარტენსი ოფილი ჯარისკაცი და ეშტონის სასახლის მფლობელია. ოჯახს აქვს მჭიდრო კავშირი სამეფო ოჯახთან.