ევროკავშირის პორტებში გაჩერებული ათასობით ავტომანქანა - როგორ აისახა ტრამპის ტარიფები ევროპელ ავტომწარმოებლებზე
ბელგიაში მდებარე ანტვერპენ-ბრიუგეს პორტი, მსოფლიოს ერთ-ერთი უდიდესი სატრანსპორტო ჰაბი , უზარმაზარ ავტოსადგომად გადაიქცა— ათასობით მსუბუქი და სატვირთო ავტომობილი, ფურგონი და ტრაქტორი უმოქმედოდ არის გაჩერებული იმის გამო, რომ მწარმოებლები ცდილობენ ტრამპის ახალი ტარიფებით გამოწვეული უარყოფითი შედეგები აირიდონ თავიდან.
- პორტის ადმინისტრაციის მიერ გამოქვეყნებული მონაცემების მიხედვით, 2025 წლის პირველ ექვს თვეში აშშ-ში ახალი მსუბუქი ავტომობილებისა და ფურგონების ექსპორტი გასული წლის იმავე პერიოდთან შედარებით 15.9%-ით შემცირდა, სატვირთოებისა და მძიმე ტექნიკის ექსპორტი (რომელშიც ტრაქტორები და სამშენებლო მანქანებიც შედის) თითქმის მესამედით, 31.5%-ით არის შემცირებული.
ტრამპის ადმინისტრაციის მიერ დაწესებულ ახალ რეგულაციებამდე, ევროპელი მწარმოებლები აშშ-ში ექსპორტისას მხოლოდ 2.5%-იან მოსაკრებელს იხდიდნენ, აპრილიდან ახალი ტარიფებით, მათ დამატებით 25%- ის გადახდა უწევთ, რაც საშუალო, ბიუჯეტური საოჯახო ავტომანქანის ფასს ათიათასობით დოლარით ზრდის.
აქამდე ევროპული პორტების მუშაობა უკვე დაზარალდა ბრექსიტის, პანდემიისა და 2024 წლის კონტეინერების დეფიციტით გამოწვეული შეფერხებების გამო.
"წლის მეორე ნახევრის პერსპექტივა გაურკვეველია. ბევრი რამ იქნება დამოკიდებული იმაზე, მოხერხდება თუ არა ევროკავშირსა და აშშ-ს შორის სავაჭრო შეთანხმების მიღწევა 1 აგვისტომდე" - აღნიშნულია პორტის განცხადებაში.
აღსანიშნავია რომ წლის პირველ ნახევარში, აშშ-დან ევროკავშირში შემოსული ტვირთის მოცულობა 17%-ით გაიზარდა, რაც ძირითადად გათხევადებული ბუნებრივი აირით იყო განპირობებული.