შავი ლომი - "მონპელიე" და "ძებრე" თბილისში, "ქონახთი" და ‘მონტობანი" სტუმრად

2025/26 წლების ჩელენჯ თასის გათამაშებაში ‘შავი ლომი’ ფრანგულ ‘მონპელიესა’ და იტალიურ ‘ძებრეს’ თბილისში უმასპინძლებს, ირლანდიურ ‘ქონახთსა’ და ფრანგულ ‘მონტობანს’ კი სტუმრად შეერკინება.

ქართული ფრენჩაიზი ევროპის პროფესიული საკლუბო რაგბის მიერ ორგანიზებულ ტურნირში ზედიზედ მესამედ ითამაშებს. გასულ ორ სეზონში ‘შავმა ლომმა’ თითო-თითო გამარჯვება მოიპოვა - 2023 წელს ‘სქარლეთსი’ უელსში, მისსავე მოედანზე 23:7 დაამარცხა, 2024 წელს კი თბილისში ფრანგულ ‘ვანს’ 22:19 სძლია.

ჩელენჯ თასის ახალი სეზონის პირველ მატჩს ‘შავი ლომი’ 6 დეკემბერს თბილისში, „მიხეილ მესხზე“ გამართავს და ქართველებისთვის კარგად ნაცნობ ფრანგულ გუნდს, ტოპ 14-ის ‘მონპელიეს’ უმასპინძლებს. ერთი კვირის თავზე ისინი ირლანდიაში გაემგზავრებიან და 13 დეკემბერს ‘ქონახთს’ შეერკინებიან.

2026 წლის პირველი თამაში სტუმრად საფრანგეთში, ‘მონტობანთან’ 10 იანვარს გამართავენ. მან გასულ სეზონში პრო დ2 მოიგო და ახალ სეზონს ტოპ 14-ში იწყებს. ჯგუფურ ეტაპს 17 იანვარს თბილისში, „მიხეილ მესხზე“ დაასრულებენ და იტალიურ ‘ძებრეს’ დაუხვდებიან. შეგახსენებთ, ‘შავი ლომი’ ამ წლის სექტემბერში ტურნეზე იტალიაში გაემგზავრება და ‘ძებრესა’ და ‘ბენეტონთან’ ამხანაგურ თამაშებს გამართავს.

R