Copart, IAAI თუ Manheim - აშშ-ის რომელ აუქციონზე სჯობს მანქანის ყიდვა და რატომ?

აშშ-ს საავტომობილო აუქციონებზე ყოველდღიურად უამრავი ავტომობილი იყიდება. ისინი ექსპორტზე სხვადასხვა ქვეყანასა და კონტინენტზე გადის. აღმოსავლეთ ევროპის ქვეყნებში და მათ შორის, საქართველოშიც აშშ-დან იმპორტირებული ავტომობილები ძალიან პოპულარულია და ადგილობრივი ავტოპარკის დიდ ნაწილს შეადგენს.

აშშ-ში, ბევრი საავტომობილო აუქციონი არსებობს, თუმცა გადაზიდვებს საქართველოში მხოლოდ რამდენიმე მათგანი ახორციელებს. Copart, IAAI და Manheim ყველაზე პოპულარული აუქციონებია, საიდანაც საქართველოში მანქანის ჩამოყვანაა შესაძლებელი. თითოეულ მათგანს თავისი სპეციფიკა აქვს და აუქციონში მონაწილეობამდე ამ საკითხში კარგად გარკვევა აუცილებელია.

კომპანია Carmall-ის გაყიდვების დირექტორი გიორგი სოზაშვილი თითოეული აუქციონის შესახებ დეტალურ გვესაუბრება.

Copart და IAAI ყველაზე პოპულარული სადაზღვევო აუქციონებია, საიდანაც საქართველოში ავტომობილის ჩამოყვანაა შესაძლებელი. ფინანსური გადარიცხვების თვალსაზრისით, ორივე 100%-ით სანდოა და მრავალწლიანი გამოცდილება აქვთ. ისინი გახლავთ სადაზღვევო აუქციონები, სადაც ავტომობილებს კომპანიები ათავსებენ. ზოგადად, აშშ-ში ნებისმიერი ავტომობილი დაზღვეულია. მანქანის დაზიანების შემდეგ, თუ სადაზღვევო კომპანია გადაწყვეტს, რომ ადგილობრივად მისი შეკეთება ვერ მოხერხდება ან არ ღირს, ავტომფლობელს ზარალს უნაზღაურებს და მანქანა აუქციონზე გააქვს. ეს ნიშნავს, რომ აუქციონზე დაუზიანებელი ავტომობილი, ფაქტობრივად, ვერ ხვდება.

ორივე აუქციონზე მანქანის ყიდვისას უნდა გაითვალისწინოთ, რომ უმჯობესია მანქანას ჰქონდეს ვიზუალური დაზიანება და იცოდეთ, რა სჭირს მას. თუ დაზიანება იდენტიფიცირებული არ არის, ეს არ ნიშნავს, რომ ის დაუზიანებელია. ამ შემთხვევაში მყიდველი რისკავს, რადგან მას შეკეთება შეიძლება ძალიან იაფი ან პირიქით, ძალიან ძვირი დაუჯდეს.

რაც შეეხება Manheim-ის აუქციონს, მასზე დაუზიანებელი მანქანების შერჩევა შესაძლებელია. ამ შემთხვევაში თავად კომპანია ამოწმებს თითოეულ ავტომობილს განთავსებამდე და შეფასებას ანიჭებს. აღნიშნული შეფასება ავტომობილის მდგომარეობის დეტალური შემოწმების შედეგად იქმნება და სანდოა. თუ Manheim-მა მანქანას მაღალი შეფასება მიანიჭა, ეს ნიშნავს, რომ მართლა კარგია. ამ შემთხვევაში უნდა ვივარაუდოთ, რომ მანქანის მესაკუთრეს უბრალოდ გადაეწყვიტა მისი გაყიდვა და ის მართლაც დაუზიანებელია.

Manheim-ის სპეციფიკიდან გამომდინარე, მასზე განთავსებული მანქანები უფრო ძვირი ღირს, ვიდრე Copart-სა და IAAI-ზე. თუმცა ხარისხი უფრო მაღალია, რისკი კი - დაბალი. ბევრ ადამიანს ურჩევნია შედარებით მეტი გადაიხადოს და მანქანა დაზიანების გარეშე ჩამოუვიდეს.

გიორგი სოზაშვილი აუქციონზე მანქანის შეძენის შესახებ სხვა რჩევებსაც გვთავაზობს:

• აუქციონის გადაწყვეტის შემდეგ, ყურადღება უნდა მიაქციოთ, რომელ შტატშია თქვენთვის სასურველი მანქანა. აშშ-ში 1300-მდე სხვადასხვა ლოკაციაზე იმართება აუქციონი. ტრანსპორტირების გამოთვლისას კი გასათვალისწინებელია აუქციონის ლოკაციიდან პორტიდან მანძილი. მაგალითად, თუ აუქციონი კონტინენტის ცენტრალურ შტატებში, ცენტრალურ ქალაქებში იმართება, მაშინ ჩამოყვანის ღირებულება შედარებით მაღალია, რადგან ის პორტამდე დიდ გზას გადის. ასევე განსხვავებაა იმის მიხედვით, კონტინენტის აღმოსავლეთ პორტიდან იგზავნება მანქანა თუ დასავლეთ. ჩვენი გეოგრაფიული მდებარეობიდან გამომდინარე, თუ დასავლეთ სანაპიროზეა ავტომობილი, უფრო ძვირი ჯდება, თუ აღმოსავლეთ სანაპიროზეა - უფრო იაფი, რადგან გემს კონტინენტისთვის შემოვლა და პანამის არხის გადაკვეთა არ უწევს;

• დასავლეთის შტატებში, როგორიცაა კალიფორნია და ვაშინგტონი, უფრო კარგი კლიმატია, ასევე უფრო მაღალი პასუხისმგებლობის მქონე ადამიანები ცხოვრობენ და შესაბამისად, იქ ნაყიდი მანქანა უფრო უკეთეს მდგომარეობაშია, ვიდრე სხვა შტატში. თუმცა აღნიშნული შტატებიდან ტრანსპორტირება 500-600 დოლარით უფრო ძვირია. ამ დროს არჩევანი ხარისხსა და ფასს შორის თავად მომხმარებელმა უნდა გააკეთოს;
• აუქციონზე ინდივიდუალურად მანქანის ყიდვა ყველას შეუძლია, მაგრამ ეს საკმაოდ დიდ სირთულეებთანაა დაკავშირებული. როგორც წესი, მანქანის შემოწმების დროს შუამავალი კომპანია ბევრად უფრო კომპეტენტურია, ვიდრე თავად მყიდველი. ეს კი რისკებს მინიმუმამდე ამცირებს. კომპანია ბევრად უფრო ოპერატიულად ახორციელებს მანქანის ევაკუატორით პორტში ტრანსპორტირებას. ასევე ყურადღებით უნდა მოხდეს კონტეინერში მანქანების ჩატვირთვა. ერთ კონტეინერში 4 ავტომობილი ეტევა. კონკრეტული ავტომობილები უნდა შეუსაბამონ ერთმანეთს. ძალიან დაზიანებული მანქანა არ შეიძლება ზემოთ მოხვდეს, რადგან შეიძლება რამე დეტალი ჩამოვარდეს ან ზეთი წვეთავდეს და ქვედა მანქანა დააზიანოს. ამ შემთხვევაშიც უმჯობესია კომპანია ჩაერიოს;
• მანქანის აშშ-დან ტრანსპორტირების პროცესზე სეზონურობას გავლენა არ აქვს. ამერიკიდან საქართველომდე არ ხდება უკიდურესი ჩრდილოეთ მხარის გამოვლა, სადაც იმდენად მკაცრი კლიმატური პირობებია, რომ შეფერხება გამოიწვიოს. ერთადერთი, ყურადღება უნდა მიაქციოთ, რამდენი ხანი იყო გაჩერებული ავტომობილი აუქციონის სადგომზე და იმ კონკრეტულ შტატში როგორი ამინდი იყო ამ პერიოდში. დროის ამ მონაკვეთში შეიძლება ყოფილიყო სეტყვა, რაც მანქანას დააზიანებდა. ფოტოებში კი არ იქნება ასახული, რადგან მათი გადაღება სადგომზე განთავსებამდე მოხდა.

აღნიშნული რჩევების გათვალისწინებით, აშშ-დან მანქანის ჩამოყვანა მართლაც მინიმალური რისკებითაა შესაძლებელი.

NS