ვიეტნამში ტურისტული ნავის ჩაძირვის შედეგად სულ მცირე 38 ადამიანი დაიღუპა

ვიეტნამში ტურისტული ნავი ჩაიძირა, რის შედეგადაც, სულ მცირე, 38 ადამიანი დაიღუპა, შვიდი კი დაკარგულად ითვლება, - ინფორმაციას The Guardian-ი ადგილობრივ მედიაზე დაყრდნობით ავრცელებს.

• მათივე ინფორმაციით, ნავ Wonder Sea-ზე 48 მგზავრი და ეკიპაჟის ხუთი წევრი იმყოფებოდა, რომლებიც ჰა-ლონგის ყურის, ტურისტებისთვის პოპულარული ადგილის, ღირსშესანიშნაობებს ათვალიერებდნენ.

ამ დროისთვის არსებული ინფორმაციით, ნავი ძლიერი ქარის შედეგად გადაბრუნდა.

გამოცემა VNExpress-ის ცნობით, მაშველებმა ინციდენტის ადგილთან ახლოს 12 ადამიანი გადაარჩინეს და 38 ცხედარი იპოვეს.

ვიეტნამის ოფიციალური საინფორმაციო სააგენტოს ცნობით, ყველა ტურისტი ვიეტნამელი იყო.