"ჯაშუში ტარაკნები" და AI რობოტები - როგორია მომავლის ომის ტექნოლოგია და რა შესაძლებლობები აქვთ მათ: "ეს ყველაფერი სამეცნიერო ფანტასტიკას ჰგავს"
გუნდბერტ შერფი იმ გერმანული სტარტაპის თანადამფუძნებელია, რომელიც მიზნად ისახავს, სამხედრო დრონებისა და საბრძოლო ხელოვნური ინტელექტის განვითარებას. სულ რამდენიმე წლის წინ მას თავისი კომპანიის, Helsing-სთვის მცირე ინვესტიციების მოსაზიდადაც კი სერიოზული ბრძოლა უწევდა, თუმცა უკრაინაში ომმა სიტუაცია რადიკალურად შეცვალა და გასულ თვეში კომპანიის ღირებულებამ 12 მილიარდ დოლარს გადააჭარბა.
- “ათწლეულების შემდეგ პირველად, ევროპა თავდაცვის ტექნოლოგიებზე ამერიკაზე მეტს ხარჯავს", - აცხადებს შერფი. მისი თქმით, დღევანდელი ევროპა შესაძლოა, თავდაცვის ინოვაციების ისეთივე მასშტაბურ ტრანსფორმაციას განიცდიდეს, როგორიც მეორე მსოფლიო ომის პერიოდში განიცადა ამერიკამ".
ნაცისტური წარსულის ტრავმით და პაციფისტური მენტალიტეტით ფორმირებული თანამედროვე გერმანია , წლების განმავლობაში ძალიან ფრთხილად ეკიდებოდა თავდაცვასთან დაკავშირებულ საკითხებს,
დიდ როლს აქ შეერთებული შტატების მიერ მიცემული უსაფრთხოების გარანტიებიც ასრულებდა, თუმცა სიტუაცია იცვლება და აშშ-ს მერყევი მხარდაჭერის ფონზე, ქვეყნის მთავრობა თავდაცვის ბიუჯეტის გასამმაგებას გეგმავს, რომელიც 2029 წლისთვის 162 მილიარდ ევროს მიაღწევს, ამ თანხის უდიდესი ნაწილი სწორედ ომის წარმოების უახლესი მეთოდების და ტექნოლოგიების შემუშავებას მოხმარდება.
Helsing იმ გერმანული სტარტაპების ტალღის ნაწილია, რომლებიც ისეთი უახლოესი საბრძოლო ტექნოლოგიების შემუშავებით არიან დაკავებული, როგორიც ტანკის მაგვარი რობოტები, უპილოტო წყალქვეშა აპარატები და ე.წ. ჯაშუში ტარაკნებია.
ისინი უკვე აღმოჩნდნენ შეიარაღების მწარმოებელი გიგანტების: Rheinmetall და Hensoldt-ის გვერდით, რომლებიც სტარტაპებისგან განსხვავებით, უფრო ტრადიციულ შეიარაღებაზე არიან ფოკუსირებული და უზარმაზარი შეკვეთები აქვთ.
მე-20 საუკუნის პირველ ნახევარში გერმანელმა მეცნიერებმა მრავალი სამხედრო ტექნოლოგია შექმნეს - ბალისტიკური რაკეტებიდან დაწყებული, რეაქტიული თვითმფრინავით დამთავრებული.
- შეცვლილი გეოპოლიტიკური სიტუაციის ფონზე, გერმანია ცდილობს საკუთარი სამხედრო ინდუსტრია განავითაროს და აშშ-ის ფირმებზე დამოკიდებულება შეამციროს, რომლებიც კვლავ ლიდერობენ უახლესი შეიარაღების წარმოებაში, თავად შეერთებული შტატები კი ის ქვეყანაა, რომელიც ყველაზე მეტ ფინანსებს ხარჯავს თავდაცვის სფეროში.
“ევროპაში ტალანტის დონე ძალიან მაღალია, მაგრამ გერმანიას ბადალი არ ჰყავს“ აცხადებს მორიგი სტარტაპ პროექტის წარმომადგენელი სვენ კრუკი", - დღეს ძალიან დიდი ზეწოლაა გერმანიაზე, რომ გახდეს ევროპის თავდაცვის ლიდერი.“
და მართლაც ზოგიერთი იდეა თითქოს სამეცნიერო ფანტასტიკის სფეროდანაა აღებული. მაგალითად, Swarm Biotactics ავითარებს კიბორგ - მწერებს, რომლებსაც კამერებით და სენსორებით აღჭურვილი მინიატურული "ზურგჩანთები“ აქვთ მიბმული, მათი მართვა ელექტრონული სტიმულაციით უნდა მოხდეს და საბრძოლო ზონებში სათვალთვალოდ გამოიყენებენ.
გერმანია აშშ-ის შემდეგ უკრაინის მეორე უმსხვილესი სამხედრო მხარდამჭერია. შეკვეთები კი, რომლებიც ადრე წლები გრძელდებოდა, ახლა თვეებში სრულდება და სტარტაპერებს უკვე აქვთ შესაძლებლობა, საკუთარი პროდუქტები საბრძოლო მოქმედებების ზონაში გამოსცადონ.
მოამზადა ლაშა ლაშქარაშვილმა