ახალ ზელანდიაში დააკავეს ქალი, რომელსაც 2 წლის გოგონა ჩემოდნით გადაჰყავდა - "მძღოლმა შენიშნა, რომ ჩანთა მოძრაობდა"
ახალ ზელანდიაში დააკავეს ქალი, რომელიც ორი წლის გოგონასთან ერთად ავტობუსით მგზავრობდა. ამ ამბავში უჩვეულო ის არის, რომ ქალს ბავშვი ხელბარგით გადაჰყავდა.
- პოლიციის განცხადებით, მას შემდეგ, რაც ისინი გამოძახებაზე მივიდნენ კაივაკის ავტობუსის გაჩერებაზე, ქვეყნის ჩრდილოეთით, მძღოლს ერთ-ერთმა მგზავრმა სთხოვა, რომ ბარგის განყოფილება გაეღო.
"მძღოლი შეშფოთდა, როდესაც შენიშნა, რომ ჩანთა მოძრაობდა. როდესაც მან ჩემოდანი გახსნა, იქ ორი წლის გოგონა აღმოაჩინა", - ნათქვამია ახალი ზელანდიის პოლიციის განცხადებაში.
27 წლის ქალს ბრალდება ბავშვის არასათანადო მოპყრობისა და უყურადღებობის მუხლით წაუყენეს.
"პატარა გოგონა ძალიან გახურებული იყო, მაგრამ სხვა მხრივ ფიზიკურად უვნებელი ჩანდა,“ - განაცხადა პოლიციამ.
სამართალდამცველთა თქმით, ბავშვი საავადმყოფოში გადაიყვანეს სამედიცინო შემოწმებისთვის. მედიისთვის უცნობია, ქალი და ბავშვი ვინ არიან ერთმანეთისთვის.
- ქალი სასამართლოს წინაშე ორშაბათს წარდგება.
"მადლობას ვუხდით ავტობუსის მძღოლს, რომელმაც შეამჩნია, რომ რაღაც რიგზე არ იყო და დაუყოვნებლივ იმოქმედა, რითაც თავიდან აიცილა ის, რაც შეიძლება ბევრად უარესი შედეგით დასრულებულიყო,“ - თქვა პოლიციამ.