"რუსმა მეომრებმა შეაჩერეს ქართული აგრესია, გადაარჩინეს ათასობით სიცოცხლე" - გაგლოევმა აგვისტოს ომზე საუბრისას საქართველო "ვერაგულ აგრესიაში" დაადანაშაულა

8 აგვისტოს ღამით, ცხინვალში, "სამშობლოს დამცველთა" მემორიალურ კომპლექსთან 2008 წლის აგვისტოს ომის დაწყების წლისთავისადმი მიძღვნილი საზეიმო-გლოვის ცერემონია გაიმართა.

ღონისძიებას ესწრებოდნენ სამხრეთ ოსეთის პოლიტიკოსები, მათ შორის თვითგამოცხადებული რესპუბლიკის პრეზიდენტი ალან გაგლოევი, ასევე რუსეთის ელჩი მარატ კულახმეტოვი და ჩრდილოეთ ოსეთის მთავრობის თავმჯდომარის მოადგილე რუსლან იკაევი.

• სიტყვით გამოსვლისას, გაგლოევმა საქართველო "ვერაგულ აგრესიაში" დაადანაშაულა და 2008 წლის 7-8 აგვისტოს ღამე "რესპუბლიკის ისტორიის შავ ფურცლად" მოიხსენია.

"სააკაშვილის ბრძანებით, ქართულმა ჯარებმა, ყოველგვარი შეთანხმების დარღვევით, ვერაგულად დაიწყეს ფართომასშტაბიანი აგრესია ჩვენი ქვეყნის წინააღმდეგ“, – განაცხადა მან.

გაგლოევმა ხაზი გაუსვა, რომ ერთ-ერთი პირველი სამიზნე რუსი სამშვიდობოები იყვნენ, რომლებიც, მისი თქმით, ქართველი სამხედროების მხრიდან "ღალატს არ ელოდნენ". მან მადლობა გადაუხადა რუსეთს და აღნიშნა, რომ 2008 წლის აგვისტოში სამხრეთ ოსეთს მხოლოდ მოსკოვი დაეხმარა.

"რუსი მეომრები, ისევე როგორც სამშვიდობოები, დასახმარებლად მოვიდნენ და ძმების დასაცავად დადგნენ. მათ შეაჩერეს ქართული აგრესია, გადაარჩინეს ათასობით სიცოცხლე და თავიდან აიცილეს გენოციდის კატასტროფის გამეორება. დღეს სამხრეთ ოსეთი მხოლოდ ტერიტორია არ არის, ეს არის დიდი „რუსული სამყაროს“ ნაწილი, სადაც მშვიდობა ყველაზე ძვირფას ღირებულებად ითვლება, მაგრამ მზად არიან იარაღით ხელში დაუდგნენ თავიანთ ძმებს დასაცავად, როცა ეს საჭიროა“, – განაცხადა გაგლოევმა.

ცერემონიის დროს ასევე აჩვენეს 2008 წლის აგვისტოს მოვლენებისადმი მიძღვნილი დოკუმენტური ფილმი. მონაწილეებმა დაღუპულთა ხსოვნას წუთიერი დუმილით პატივი მიაგეს და მემორიალთან ყვავილები მიიტანეს.