"ნაციონალურმა მოძრაობამ" და "კოალიცია ცვლილებისთვის" ცესკო-სთვის თვითმმართველობის არჩევნებში მონაწილეობის თაობაზე არ მიმართვის გამო, საარჩევნო ნომრები დაკარგეს

ორმა სუბიექტმა, რომლებმაც მოგვმართა ჩვენ რიგითი ნომრების გამოყენების თაობაზე, მაგრამ არ მოუმართავთ არჩევნებში მონაწილეობის მისაღებად, მათი ნომრები 4 [„კოალიცია ცვლილებისთვის“] და 5 [„ერთიანობა ნაციონალური მოძრაობა“] წილისყრაში იქნება გათამაშებული,- ამის შესახებ ცენტრალურ საარჩევნო კომისიაში გამართულ შეხვედრაზე, ცესკოს თავმჯდომარემ გიორგი კალანდარიშვილმა განაცხადა.

• მისი თქმით, საერთო ჯამში თვითმმართველობის არჩევნებში მონაწილეობის მისაღებად 17-მა პარტიამ შეიტანა განაცხადი, ხოლო 5 საარჩევნო სუბიექტს, რომლებმაც 2024 წლის საპარლამენტო არჩევნებში მიიღეს მონაწილეობა, ის ნომრები მიენიჭათ, რომელიც საპარლამენტო არჩევნების დროს ჰქონდათ.

„8 აგვისტოს საღამოს 18:00-ზე დასრულდა განცხადებების მიღების პროცესი და დღეის მდგომარეობით, სულ 17-მა პოლიტიკურმა გაერთიანებამ მომართა ცესკოს არჩევნებში თანამონაწილეობს მიზნით, საიდანაც 14 სუბიექტი უკვე რეგისტრირებული გახლავთ, სამ სუბიექტთან კი პროცესი განხილვის პროცესშია და კანონით გათვალისწინებულ ვადებში იქნება გადაწყვეტილება მიღებული.

ინსტიტუციისთვის მნიშვნელოვანია, რომ ყველა სუბიექტს ჰქონდეს თანაბარი პირობები არჩევნებში მონაწილეობის მიღების მიზნით, დასრულდა მომართვის ვადა მივიღეთ გადაწყვეტილება, რომ აღნიშნული საკითხის შესაბამისად შემჭიდროებულ ვადებში მოხდეს განხილვა, რათა დროულად იქნეს პარტიებისთვის რიგითი ნომრების მინიჭება, რომელიც მათ საინფორმაციო საარჩევნო კამპანიებში იქნება გამოყენებული.

5-მა პოლიტიკურმა გაერთიანებამ, რომლებმაც ვადებში მოგვმართეს, მათ პირდაპირ მიეკუთვნებათ ის რიგითი ნომრები, რომლითაც გასულ წელს საპარლამენტო არჩევნებში მონაწილეობდნენ. 12 სუბიექტის შემთხვევაში განხორციელდება წილის ყრა, კენჭისყრაში მონაწილეობას მიიღებს 1-ელი ნომრიდან, 12 თავისუფალი ნომერი.

ორმა სუბიექტმა, რომლებმაც მოგვმართა ჩვენ რიგითი ნომრების გამოყენების თაობაზე, მაგრამ არ მოუმართავთ არჩევნებში მონაწილეობის მისაღებად, მათი ნომრები 4 [„კოალიცია ცვლილებისთვის“] და 5 [„ერთიანობა ნაციონალური მოძრაობა“] წილისყრაში იქნება გათამაშებული“,- განაცხადა გიორგი კალანდარიშვილმა.

ასევე, წილისყრის მიხედვით საარჩევნო ნომერი 4 პარტია „ქართველ ერთობას“, ხოლო საარჩევნო ნომერი 5 პარტია „ჩვენი გაერთიანებული საქართველო“ ერგო.