სიმსუქნის წინააღმდეგ ფართოდ გამოყენებული მედიკამენტი ოზემპიკი შესაძლოა მხედველობის დაკარგავს იწვევდეს - მწარმოებელი კომპანიას ათასობით ადამიანი უჩივის
მასობრივად გამოყენებული პრეპარატების - ოზემპიკისა და ვეგოვის მწარმოებლის, "ნოვო ნორდისკის" წინააღმდეგ სარჩელების რაოდენობა ლამის ყოველდღიურად იზრდება. მომხმარებლებში კომპანიის მიმართ მზარდი უკმაყოფილება მას შემდეგ გაჩნდა, ბოლოდროინდელმა კვლევამ მედიკამენტებსა და მხედველობის დაკარგვის უეცარ, შეუქცევად ფორმას შორის კავშირი აღმოაჩინა.
დაავადება, რომელიც ცნობილია, როგორც არაარტერიული წინა იშემიური ოპტიკური ნეიროპათია (NAION), როგორც ამბობენ, "ოზემპიკის" ათასობით მომხმარებელს დაუდგინდა, სასამართლო დავის ხარჯები კი უკვე მილიარდობით დოლარს შეადგენს.
სამართლებრივი დავის არსი იმაში მდგომარეობს, რომ "ნოვო ნორდისკმა" მომხმარებლები პრეპარატის მხედველობის პოტენციურად დაკარგვასთან დაკავშირებული გვერდითი მოვლენების შესახებ არ გააფრთხილა.
"ამერიკის ოფთალმოლოგიის ასოციაცია ვარაუდობს რომ ოზემპიკმა და სხვა GLP-1 პრეპარატებმა შესაძლოა რამდენიმე გზით გამოიწვიონ მხედველობის გაუარესება ან სიბრმავე... ოზემპიკთან და სხვა სემაგლუტიდებთან დაკავშირებული მხედველობის ყველაზე გავრცელებული პრობლემა დიაბეტური რეტინოპათიაა. მხედველობის სხვა, უფრო უეცარი ცვლილებები კი სიბრმავის გამომწვევი ხდება, განსაკუთრებით ერთ თვალში. ჩვენი ვარაუდით, მომდევნო კვლევები ოზემპიკთან დაკავშირებული მხედველობის გაუარესების შესახებ, დიდ როლს ითამაშებს სასამართლო პროცესებზე", - განაცხადა ადვოკატმა რობერტ კინგ ლოუმ.
ცნობისთვის:
სემაგლუტიდი (სავაჭრო სახელწოდება - ოზემპიკი, ვეგოვი) აშშ-ის სურსათისა და მედიკამენტების სააგენტომ (FDA) ჯერ კიდევ 2017 წელს დაამტკიცა როგორც შაქრიანი დიაბეტი ტიპი 2-ის სამკურნალო საინექციო მედიკამენტი,რომელიც ფიზიკურ აქტივობასა და კვების სწორ რეჟიმთან ერთად სისხლში შაქრის დონეს არეგულირებს. ბოლოდროინდელმა კვლევებმა აჩვენა, რომ სემაგლუტიდის (ვეგოვი) განსაზღვრული დოზის მიღებისას ითრგუნება მადა და აღინიშნება დამატებითი ეფექტი წონის კლების კუთხით. ამის გამო FDA-მ ვეგოვი ქრონიკული ჭარბი წონის სამკურნალო მედიკამენტად დაამტკიცა ჭარბწონიანი ზრდასრული ადამიანებისთვის, რომლებსაც წონასთან დაკავშირებული ერთი დაავადება მაინც აქვთ (მაგალითად, მაღალი არტერიული წნევა, მე-2 ტიპის დიაბეტი ან ქოლესტერინის მომატება). შესაბამისად, მედიკამენტი სწრაფად იქცა მასშტაბურად გამოყენებად საშუალებად სწორედ სიმსუქნესთან ბრძოლისთვის, მათ შორის საქართველოშიც.
სემაგლუტიდის ყველაზე ხშირი გვერდითი მოვლენებია გულისრევა, ღებინება, ფაღარათი და შეკრულობა, სხვადასხვა ინტენსივობის მუცლისა და თავის ტკივილი. შედარებით იშვიათად ვითარდება პანკრეატიტი (კუჭქვეშა ჯირკვლის ანთება), რომელსაც შეიძლება სერიოზული გართულებები მოჰყვეს, მათ შორის – პოსტპანკრეატიტული შაქრიანი დიაბეტი. აღწერილია სემაგლუტიდის მიღებით გამოწვეული ნაღვლის ბუშტის გაღიზიანება, განსაკუთრებით - კენჭოვანი დაავადების მქონე პაციენტებთან, თირკმლის მწვავე უკმარისობა და მწვავე ალერგიული რეაქცია. ვირთხებთან სემაგლუტიდის გამოყენებამ ფარისებრი ჯირკვლის ავთვისებიანი სიმსივნე გამოიწვია, ამიტომ ამ მედიკამენტის მიღება იკრძალება ანამნეზში ან ახლო ნათესავებთან (მშობლები, დედმამიშვილები) ფარისებრი ჯირკვლის მედულარული კარცინომის არსებობისას. ახლა ამ ჩამონათვალს ემატება არაარტერიული წინა იშემიური მხედველობის ნერვის ნეიროპათია ( NAION)
მიუხედავად იმისა, რომ პრეპარატები ეფექტიანი აღმოჩნდა მე-2 ტიპის დიაბეტის მართვისა და წონის დაკლების ხელშეწყობის თვალსაზრისით, სამედიცინო ჟურნალ JAMA Ophthalmology-ში გამოქვეყნებულმა ბოლოდროინდელმა კვლევამ აჩვენა NAION-ის გაზრდილი რისკი იმ პაციენტებში, რომლებიც იღებდნენ სემაგლუტიდს, Ozempic-ის, Wegovy-ის და Rybelsus-ის აქტიურ ინგრედიენტს.
- არაარტერიული წინა იშემიური ოპტიკური ნეიროპათია, იგივე NAION, თვალის სერიოზული დაავადებაა, რომელიც იწვევს მხედველობის უეცარ, ხშირად უმტკივნეულო დაკარგვას მხედველობის ნერვში სისხლის მიმოქცევის ნაკლებობის გამო. სიმპტომები შეიძლება მოიცავდეს მხედველობის დაბინდვას, მხედველობის არეში ბნელ უბანს ან ჩრდილს, ფერების აღქმის დაკარგვას და სინათლის მიმართ მგრძნობელობას. ზოგიერთ შემთხვევაში, მხედველობის დაკარგვა შეიძლება გაღვიძებისთანავე მოხდეს.
სარჩელები, რომელთა საერთო ღირებულებამ შესაძლოა 2 მილიარდ დოლარს მიაღწიოს, GLP-1 RA მედიკამენტების წინააღმდეგ უფრო ფართო სამართლებრივი დავის ნაწილია. მიუხედავად იმისა, რომ ჯერ არ არის დასრულებული ანგარიშსწორება, იურიდიული ექსპერტების შეფასებით, NAION-ის მსგავსი მძიმე დაზიანებებისთვის ინდივიდუალური ანგარიშსწორება ნოვო ნორდისკს შესაძლოა ძალიან ძვირი დაუჯდეს.
"ნოვო ნორდისკმა" აღიარა JAMA Ophthalmology-ის კვლევა, თუმცა ასევე ხაზი გაუსვა მის შეზღუდვებს, მათ შორის კვლევის დაკვირვებით ხასიათს, რომელსაც არ შეუძლია მიზეზობრიობის საბოლოოდ დამტკიცება. კომპანიამ განაცხადა, რომ პრეპარატებსა და NAION-ს შორის პირდაპირი კავშირის შესაფასებლად შემდგომი კვლევებია საჭირო.
იმ პირებს, რომლებსაც ოზემპიკის ან სხვა GLP-1 მედიკამენტების მიღების შემდეგ მხედველობის დაკარგვა აღენიშნებათ, იურიდიული ადვოკატი ურჩევს, რომ უფასო კვლევა ჩაიტარონ. ამავდროულად, პაციენტებს მკაცრად ეკრძალებათ ექიმთან წინასწარი კონსულტაციის გარეშე დანიშნული მედიკამენტის შეწყვეტა, რადგან ამან შესაძლოა ჯანმრთელობის გაუარესების მხრივ სერიოზული შედეგები იქონიოს.
წყარო: aol.com
მოამზადა: ანა სიბოშვილმა