კიმ ჩენ ინის პირადი საპირფარეშო, რომელსაც საგულდაგულოდ ასუფთავებენ, რათა დაიცვან დიქტატორის დნმ - რა დეტალები გახდა ცნობილი კიმის ჩინეთში მოგზაურობის შემდეგ
ჩრდილოეთ კორეის ლიდერი, კიმ ჩენ ინი, ჩინეთში საკუთარი კერძო საპირფარეშოთი ჩავიდა, რათა დაეცვა თავისი დნმ და ნებისმიერი ინფორმაცია ჯანმრთელობის მდგომარეობის შესახებ.
ამის შესახებ ინფორმაციას იაპონური და სამხრეთ კორეული დაზვერვის სამსახურები ავრცელებენ.
ასევე, შეამჩნიეს როგორ საგულდაგულოდ ასუფთავებდნენ მისი თანაშემწეები ოთახს, სადაც რუსეთის პრეზიდენტ ვლადიმერ პუტინს შეხვდა.
- საიდუმლო საპირფარეშო მის მწვანე ჯავშანმატარებელში იყო განთავსებული, რომლითაც ის პეკინში გაემგზავრა ქვეყნის უდიდეს სამხედრო აღლუმზე, რომელიც მეორე მსოფლიო ომის დასრულების 80 წლისთავს აღნიშნავდა.
"უმაღლესი ლიდერის ფიზიკურ მდგომარეობას დიდი გავლენა აქვს ჩრდილოეთ კორეის რეჟიმზე. ჩრდილოეთ კორეა განსაკუთრებულ ძალისხმევას ხარჯავს, რათა დალუქოს ყველაფერი, რაც მასთან არის დაკავშირებული, მაგალითად, თმა და ექსკრემენტები.", - განაცხადა სამხრეთ კორეის დაზვერვის ოფიციალურმა წარმომადგენელმა იაპონურ გამოცემა Nikkei Asia-ს.
კრემლის რეპორტიორმა ალექსანდრე იუნაშევმა გააზიარა ვიდეო, რომელშიც ჩანს, თუ როგორ ასუფთავებენ კიმის თანაშემწეები ოთახს მას შემდეგ, რაც მან ორ საათნახევარი შეხვედრა გამართა რუს ლიდერთან.
იუნაშევმა აღნიშნა, რომ კიმის თანამშრომლებმა "წაიღეს ჭიქა, საიდანაც მან დალია, გაწმინდეს სკამის შალითა და ავეჯის ის ნაწილები, რომლებსაც კორეელი ლიდერი შეეხო."
- კიმ ჩენ ინის მიერ კერძო საპირფარეშოს გამოყენება და მისი პირადი სივრცის მკაცრი კონტროლი არ არის უჩვეულო ავტორიტარული ლიდერებისთვის. ეს პრაქტიკა ხშირად უკავშირდება არა მხოლოდ ჯანმრთელობის შესახებ ინფორმაციის დაცვას, არამედ უსაფრთხოებას, რათა თავიდან აიცილონ შესაძლო მოწამვლის ან სხვა სახის თავდასხმის რისკი.
კიმ ჩენ ინის მსგავსად, სხვა ავტორიტარი ლიდერებიც, მაგალითად, რუსეთის პრეზიდენტი ვლადიმერ პუტინი, ცნობილნი არიან უსაფრთხოების ზომების უკიდურესად მკაცრად დაცვით.