საქართველოს მთავრობა ევრობასკეტის 1/8-ფინალში, გულშემატკივრებისთვის ჩარტერულ რეისებს დაასუბსიდირებს - რა ეღირება ფრენის ბილეთი?
საქართველოს კალათბურთის ეროვნული ნაკრები ევრობასკეტის პლეი-ოფში გავიდა! ესპანეთთან ბერძნების გამარჯვების შემდეგ, ჩვენმა გუნდმა მერვედფინალის საგზური მოიპოვა.
საქართველოს მთავრობა დაასუბსიდირებს ორმხრივ ფრენებს თბილისიდან რიგაში, სადაც ევრობასკეტის მერვედფინალი გაიმართება.
რა უნდა იცოდეს გულშემატკივარმა?
ფრენის დეტალები: ფრენები თბილისიდან რიგაში 7 სექტემბერს დილას, ხოლო უკან, რიგიდან თბილისში, 8 სექტემბერს საღამოს შესრულდება. მთავრობა კი ჩარტერულ ავიარეისებს დაასუბსიდირებს. შესაბამისი ინფორმაცია მთავრობის ოფიციალურ გვერდზე გამოქვეყნდა.
ბილეთის ღირებულება:
სუბსიდირებული ცალმხრივი ავიაბილეთის ღირებულება 195 ევრო იქნება.
როგორ შევიძინოთ: ბილეთების შეძენა შესაძლებელია ონლაინ პლატფორმა tkt.ge-ზე, 15:00 საათიდან.
ვის დავუპირისპირდებით მერვედფინალში?
უკვე ცნობილია, რომ ჩვენი გუნდის მეტოქე საფრანგეთის ნაკრები იქნება. ჩვენი კალათბურთელები ევრობასკეტის პლეი-ოფში შემდეგ გუნდებს დაუპირისპირდებიან:
საქართველო - საფრანგეთი
გერმანია - პორტუგალია
ლიეტუვა - ლატვია
თურქეთი - შვედეთი
პოლონეთი - ბოსნია
სერბეთი - ფინეთი
საბერძნეთი - ისრაელი
იტალია - სლოვენია
მთელი საქართველო მოუთმენლად ელის ჩვენი გუნდის გამოსვლას და მზად არის, მხარი დაუჭიროს მათ ამ მნიშვნელოვან მატჩში.