მატილდა გვარლიანი ყველაზე მაღალანაზღაურებად მოდელებს შორისაა - რა ინფორმაცია გამოაქვეყნა Models.com-მა
ქართველი მოდელი, მატილდა გვარლიანი, ოფიციალურად მოხვდა Models.com-ის "Money List" რეიტინგში, როგორც მაღალშემოსავლიანი (High Earner) მოდელი. ის პირველი ქართველია, ვინც ამ პრესტიჟულ სიაში მოხვდა.
Models.com-ის ინფორმაციით, რომელიც მოდელების შემოსავლის შესახებ მონაცემებს უშუალოდ სამოდელო სააგენტოებისგან იღებს, მატილდას ანაზღაურება ერთ-ერთი ყველაზე მაღალია მოდის ინდუსტრიაში.
მატილდას მიღწევები
მატილდა გვარლიანი მუშაობს მსოფლიოს წამყვან სამოდელო სააგენტოებთან, მათ შორის:
· Next New York (ნიუ იორკი)
· Next Paris (პარიზი)
· Next London (ლონდონი)
· Next Milan (მილანი)
· Iconic Management (ბერლინი)
მან მონაწილეობა მიიღო ისეთი ცნობილი ბრენდების კამპანიებში, როგორებიცაა Louis Vuitton, Saint Laurent, Dior, Calvin Klein, და H&M. ასევე, მისი სახე ამშვენებდა ისეთი პოპულარული ჟურნალების გარეკანებს, როგორებიცაა Vogue Korea, Vogue Mexico, Vogue Netherlands და D Repubblica.
რას ნიშნავს იყო "High Earner" მოდელი?
სამოდელო ინდუსტრიაში, ტოპ მოდელების შემოსავლები ხშირად საიდუმლოა. Models.com აანალიზებს მოდელების წარმატებას სხვადასხვა კრიტერიუმით - მათ შორის, ცნობილი ბრენდების კამპანიებში მონაწილეობა, ჟურნალების გარეკანებზე გამოჩენა და სხვა, და ამ მონაცემების საფუძველზე ადგენს "Money List"-ს. ეს სია ასახავს იმ მოდელების ჯგუფს, რომლებსაც ინდუსტრიაში ყველაზე მაღალი ჰონორარები აქვთ. ამ სიაში მოხვედრა მოდელის კარიერის უმაღლესი აღიარებაა და ადასტურებს, რომ ის ერთ-ერთი ყველაზე მოთხოვნადი და მაღალანაზღაურებადი პროფესიონალია.