ისტორიაში პირველად - საქართველოს ნაკრებმა საფრანგეთი 80:70 დაამარცხა და ევრობასკეტის მეოთხედფინალში გავიდა!
ევრობასკეტის მერვედფინალში საქართველოს ნაკრებმა საფრანგეთის ნაკრები 80:70 დაამარცხა და ტურნირის მეოთხედფინალში ისტორიაში პირველად ითამაშებს!
საფრანგეთის ნაკრებს ჯგუფურ ეტაპზე მხოლოდ 1 წაგება ჰქონდა და ამ შეხვედრის ფავორიტადაც ითვლებოდა, თუმცა ალექსანდრ ჯიკიჩის გუნდის ბრძოლისუნარიანობისა და გუნდური თამაშის წყალობით, სახელოვან მეტოქეს ვაჯობეთ.
- საქართველოს ნაკრებმა თამაში ბოლდუინის, სანაძის, მამუკელაშვილის, შენგელიასა და ბითაძის ხუთეულით დაიწყო და პირველი ტაიმი ფრანგებს 1 ქულის სხვაობით, 38:37 მოვუგეთ.
მეორე ტაიმში თორნიკე შენგელიამ არაერთი მნიშვნელოვანი სამქულიანი ჩააგდო, ბოსნია-ჰერცეგოვინასთან მძიმე მატჩის შემდეგ, კაპიტანმა ლიდერობა საკუთარ თავზე აიღო და შესანიშნავად ითამაშა. უნდა აღინიშნოს ბექა ბურჯანაძის მნიშვნელოვანი ტყორცნებიც, რომლის საშუალებითაც მესამე მეოთხედში წინ გავედით.
მატჩის საუკეთესო მოთამაშე თორნიკე შენგელია გახდა.
საქართველოს ნაკრები ტურნირის მეოთხედფინალში ფინეთის ნაკრებს შეხვდება.