აჯანყებული Gen Z და 19 მოკლული პროტესტანტი - ნეპალის პრემიერი გადადგა, მოხსნილია სოცქსელებზე დაწესებული ყველა შეზღუდვა: დეტალები (ფოტო/ვიდეო)

საპროტესტო აქციების ფონზე, რომელსაც 19 ადამიანი ემსხვერპლა, ნეპალის პრემიერ-მინისტრი გადადგა. მედიის ინფორმაციით, პრემიერმა ჰ.პ. შარმა ოლიმ გადადგომის შესახებ გადაწყვეტილება დღეს მიიღო. ამას წინ უძღოდა ათასობით ადამიანის ქუჩაში გამოსვლა და ძალადობრივი დაპირისპირებები.

მისი გადადგომა, რამდენიმე სხვა კანონმდებელთან ერთად, მას შემდეგ გადაწყდა, რაც ხელისუფლებამ ცეცხლი გაუხსნა ქუჩაში გამოსულ ახალგაზრდა დემონსტრანტებს და სულ მცირე 19 ადამიანი დაიღუპა.

გარდა გადადგომისა, მთავრობამ მოხსნა რამდენიმე დღის წინ დაწესებული აკრძალვა ძირითად სოციალურ მედია პლატფორმებზე, მათ შორის WhatsApp-სა და Instagram-ზე. მთავრობას ასევე დაწესებული ჰქონდა კომენდანტის საათი.

• ქვეყანაში მრავალათასიანი საპროტესტო გამოსვლები სწორედ მას შემდეგ დაიწყო, რაც მთავრობამ ქვეყანაში 26 პოპულარული სოციალური ქსელი აკრძალა.

პლატფორმებს მისცეს 7 დღის ვადა, რომ კომუნიკაციებისა და საინფორმაციო ტექნოლოგიების სამინისტროს ბაზაში დარეგისტრირებულიყვნენ. მიზანი კონტენტის მონიტორინგი იყო, თუმცა ყველაზე პოპულარული ქსელებიდან არცერთმა არ დათანხმდა რეგისტრაციას.

ეს გადაწყვეტილება ხელისუფლებამ სოციალურ მედიაში სიყალბის, სიძულვილის ენისა და ონლაინ თაღლითობის წინააღმდეგ ბრძოლის აუცილებლობით ახსნა.

ამის შემდეგ, ათასობით მომიტინგე გამოვიდა ქუჩებში, მათ შორის კატმანდუში, პარლამენტის შენობის წინ, რათა გამოეხატათ აღშფოთება მთავრობის მიერ, ქვეყანაში Facebook-ის, X-ის და YouTube-ის მსგავსი პლატფორმების აკრძალვის გამო.

მათ დასაშლელად პოლიციამ გამოიყენა წყლის ჭავლი, ხელკეტები და რეზინის ტყვიები.

პროტესტის ტალღამ სწრაფად მოიცვა დედაქალაქი და სხვადასხვა ლოკაციები.

დემონსტრანტებმა შტურმით აიღეს მთავრობის მთავარი ადმინისტრაციული შენობა, სადაც პრემიერის ოფისი იყო განთავსებული.

გარდა ამისა, მომიტინგეებმა ცეცხლი წაუკიდეს მაღალი თანამდებობის პირების სახლებს, მათი პოლიტიკური პარტიების ოფისებს, პოლიციის განყოფილებებსა და სამთავრობო შენობებს. დედაქალაქ კატმანდუში განლაგებულმა უსაფრთხოების ძალებმა ვერ შეძლეს წინააღმდეგობის გაწევა.

• დაწვეს ყოფილი პრემიერ-მინისტრის ნეპალის კომუნისტური პარტიისა და ნეპალის კონგრესის შტაბ-ბინებიც, ორი ყოფილი პრემიერ-მინისტრის, პუშპა კამალ დაჰალის და შერ ბაჰადურ დეუბას სახლები.
• მიწასთან არის გასწორებული ყოფილი შინაგან საქმეთა მინისტრის, რამეშ ლეხაკის სახლი. მან თანამდებობა მას შემდეგ დატოვა, რაც აქციაზე მყოფი 19 დემონსტრანტი დაიღუპა.

ინტერნეტსა და სოციალურ მედიაზე უფასო წვდომა სასიცოცხლოდ მნიშვნელოვანია ნეპალის ტურიზმის ინდუსტრიისთვის, რომელიც ქვეყნის შემოსავლის დიდ ნაწილს შეადგენს.

ქვეყანაში მილიონობით ადამიანი იყენებს სოციალურ მედიას, რომელთაგან Instagram ყველაზე პოპულარული პლატფორმაა. მომხმარებლების თქმით, ისინი სოციალურ მედიას არა მხოლოდ გართობის ან ახალი ამბების მოხმარებისთვის, არამედ ბიზნესისთვისაც იყენებენ.

გარდა ამისა, პროტესტანტების უმეტესობამ განაცხადა, რომ ისინი აპროტესტებდნენ მთავრობის ავტორიტარულ მეთოდებს და კორუფციას.

წყარო