როგორია ევროპის გეგმა პუტინის შეჭრის შესაჩერებლად? - "სულ უფრო მეტი მოწოდება ისმის, დააჩქარონ ჭაობების აღდგენა"
დიდი ბრიტანეთის თავდაცვის მდივნის, ჯონ ჰილის განცხადებით, ვლადიმერ პუტინი დასავლეთს "გამოცდას უწყობს". ეს კი აშკარა გახდა მას შემდეგ, რაც სამშაბათს ღამით, რუსულმა დრონებმა პოლონეთის საჰაერო სივრცე დაარღვიეს.
პოლონეთის პრემიერ-მინისტრმა, დონალდ ტუსკმა, დაგმო ქვეყნის საჰაერო სივრცის უპრეცედენტო დარღვევა და განაცხადა, რომ „ეს სიტუაცია ყველას გვაახლოებს ღია კონფლიქტთან".
პოლონეთმა ნატოს მე-4 მუხლი გამოიყენა, რომლის თანახმადაც ნებისმიერ წევრს შეუძლია სასწრაფო მოლაპარაკებების მოწვევა იმ შემთხვევაში, თუ მისი "ტერიტორიული მთლიანობა, პოლიტიკური დამოუკიდებლობა ან უსაფრთხოება" საფრთხის ქვეშ დადგება. სამხედრო ალიანსის გენერალურმა მდივანმა, მარკ რუტემ, რუსეთის პრეზიდენტს მკაცრი გაფრთხილება მისცა და მოუწოდა, "შეეწყვიტა მოკავშირეთა საჰაერო სივრცის დარღვევა".
19 რუსული დრონიდან ოთხი პოლონეთისა და ნატოს თვითმფრინავებმა ჩამოაგდეს - ეს პირველი შემთხვევაა, როდესაც კრემლის დრონები ნატოს წევრი ქვეყნის ტერიტორიის თავზე ფრენისას გაანეიტრალეს.
ნატოს წევრი ქვეყნები რუსეთის პრეზიდენტის შეჭრის მოლოდინში მკვეთრ ზომებს იღებენ - პოლონეთის ტერიტორიაზე შეჭრა კი იმაზე მეტყველებს, რომ პუტინის ინტერესები უკრაინას ცდება.
გერმანიის კანცლერმა ფრიდრიხ მერცმა ორშაბათს განაცხადა, რომ პუტინის "იმპერიალისტური გეგმა უკრაინის დაპყრობით არ დასრულდება და ეს მხოლოდ დასაწყისი იქნება".
ამასობაში, ბრიუსელმა წამოიწყო "მარაგების შექმნის სტრატეგია", რათა უზრუნველყოს ევროპაში ძირითადი საქონლის უწყვეტი მიწოდება პოტენციური კრიზისის პირობებში. საფრანგეთის მთავრობამ ჯანდაცვის ორგანოებს 2026 წლის მარტისთვის ჩართულობისკენ მოუწოდა და საავადმყოფოებს სთხოვა, მოემზადონ როგორც ქვეყნის მასშტაბით, ასევე საზღვარგარეთიდან სამხედრო პაციენტების პოტენციური ნაკადისთვის.
მანამდე, უკრაინის პრეზიდენტმა ვოლოდიმირ ზელენსკიმ განაცხადა, რომ პუტინმა შესაძლოა მომდევნო ხუთი წლის განმავლობაში ნატოს რომელიმე ქვეყანას შეუტიოს. თუმცა, საფრთხე შესაძლოა გაცილებით ადრე გამოვლინდეს, რადგან ჰილიმ აღნიშნა, რომ პოლონეთში შეჭრის შემდეგ "რუსეთმა ევროპის მიმართ მტრული განწყობის ახალ დონეს მიაღწია“.
რუსეთი აცხადებს, რომ პოლონეთში არცერთ სამიზნეზე თავდასხმას არ გეგმავდა, თუმცა ვარშავის თავდაცვის მინისტრმა უარყო შემთხვევითი გაუმართაობის შესახებ ნებისმიერი თეორია. "რუსული დრონები პოლონეთის საჰაერო სივრცეში ადრეც შეჭრილან - არა მხოლოდ დრონები, არამედ რაკეტებიც", - განაცხადა რადოსლავ სიკორსკიმ.
"როდესაც ამას ერთი ან ორი დრონი აკეთებს, შესაძლებელია, რომ ეს ტექნიკურ გაუმართაობას დავაბრალოთ, მაგრამ ამ შემთხვევაში 19 დარღვევა დაფიქსირდა და წარმოუდგენელია, რომ ეს შეიძლება შემთხვევითი იყოს.“
2022 წლის თებერვალში, როდესაც რუსი ჯარისკაცები კიევისკენ მიემართებოდნენ, უკრაინამ სასწრაფო ზომები მიიღო. პუტინის შეტევის მოსაგერიებლად, შეიარაღებულმა ძალებმა კიევის ჩრდილოეთით, მდინარე ირპინზე, საბჭოთა პერიოდის კოზაროვიჩის კაშხალში ორმო გათხარა, რის შედეგადაც 2800 ჰექტარი მიწა დაიტბორა. ქალაქის დაცვის უკანასკნელი მცდელობა გამართლდა. როდესაც მიწა გაუვალ, შავ ჭაობად გადაიქცა, წინ მიმავალი რუსული ტანკები „ტალახში გაიჭედნენ“.
- ახლა ევროპაში სულ უფრო მეტი მოწოდება ისმის, დააჩქარონ ჭაობების აღდგენა. მეორე მსოფლიო ომის შემდეგ, ჭარბტენიანი ტერიტორიების უზარმაზარი რაოდენობა მომგებიან სასოფლო-სამეურნეო მიწებად გადაკეთდა. ევროპაში ტორფიანი მიწების თითქმის ნახევარი დეგრადირებულია, ძირითადად ხელოვნური დრენაჟის გამო, რაც გარემოზე უარყოფით გავლენას ახდენს.
პოლონეთის თავდაცვის ინფრასტრუქტურის განვითარების პროექტის ფარგლებში, რუსეთთან მისი საზღვრების მახლობლად ჭაობიანი მიწები და ტყეები გაფართოვდება. პუტინის ჯარების შესაკავებლად ჭაობიანი ტერიტორიების გაფართოების გეგმებთან ერთად, ამ ზაფხულს ქვეყანამ რუსეთსა და ბელარუსს შორის საზღვარზე, 20 კილომეტრიან მონაკვეთზე დამცავი ნაღმების ველები დაამატა. გასული წლის ბოლოს შეიარაღებული ძალების რაოდენობა დაახლოებით 190 000 ადამიანს შეადგენდა, მათ შორის სახმელეთო, საჰაერო, საზღვაო, სპეციალური დანიშნულების ძალებსა და ტერიტორიული თავდაცვის ძალებს.
წაიკითხეთ ასევე: