ტრამპმა კიდევ ერთი ვენესუელური ნავი ააფეთქა – მადურო 2.5 მილიონი ჯარისკაცის მობილიზაციას აცხადებს: "გაფრთხილებული ხართ!"
მედიაში გავრცელდა კადრები, სადაც იმ ნავის რაკეტით განადგურებაა ასახული, რომელშიც 11 ადამიანი იმყოფებოდა. ტრამპის განცხადებით ნავით ნარკოტიკები გადაჰქონდათ და იერიშს სამი "ტერორისტი მამაკაცი" ემსხვერპლა.
ვიდეოში ჩანს პატარა ნავი, რომელიც მღელვარე ზღვის ტალღებზე მოძრაობს, შემდეგ მას აშშ-ს შეიარაღებული ძალების მიერ გაშვებული რაკეტა ხვდება, ხდება მძლავრი აფეთქება და ნავი ცეცხლის ალში ეხვევა.
- ტრამპმა ვიდეო საკუთარ სოციალურ პლატფორმა Truth Social-ზე განათავსა, სადაც ნარკოკურიერებს პირდაპირი გაფრთხილება გაუგზავნა.
"გაფრთხილებული ხართ — თუ თქვენ გადაგაქვთ ნარკოტიკები, რომლებიც ამერიკელებს კლავს, ჩვენ გდევნით! ათწლეულების განმავლობაში ამ კარტელების უკანონო საქმიანობამ ამერიკულ საზოგადოებას განადგურება მოუტანა და მილიონობით მოქალაქე შეიწირა. ეს დასრულდა.“ - დაწერა აშშ-ს პრეზიდენტმა.
პასუხად ვენესუელის პრეზიდენტმა ნიკოლას მადურომ განაცხადა, რომ აშშ-ის მიერ გამოქვეყნებული ვიდეო ხელოვნური ინტელექტის მეშვეობით არის დამუშავებული.
ტრამპი-მადუროს მწვავე დაპირისპირება უკვე რამდენიმე კვირაა გრძელდება.
ტრამპი ვენესუელას პრეზიდენტს “აშშ-სა და დასავლეთის ნახევარსფეროში, მასობრივ მკვლელობაში, ნარკოტრაფიკში, სექსტრეფიკინგში, ძალადობასა და ტერორისტულ ქმედებებში ადანაშაულებს“ ვაშინგტონს მასზე 50 მილიონი დოლარის ჯილდოც აქვს დაწესებული.
ნიკოლას მადურო ამბობს რომ “ტრამპს არასოდეს მისცემს საშუალებას, ბომბებით, სიკვდილითა და შანტაჟით დაემუქროს.“
“ყველამ იცის, რომ ნარკოტიკებისა და ნარკოტრაფიკის ამბავი შეთქმულებაა. ეს არის საბაბი – მათ სურთ რეჟიმის შეცვლა, ქვეყნის სიმდიდრის დაპყრობა და ნავთობის მარაგებზე კონტროლის აღება,“ – განაცხადა მადურომ და მედიის წარმომადგენლებს "ვენესუელას დასაცავად 2.5 მილიონი სამხედროს მობილიზაციის შესახებ" ამცნო.