"აქ ბევრი რამაა, რაც გულს მითბობს" - მელანია და დონალდ ტრამპების ვიზიტი გაერთიანებულ სამეფოში საპროტესტო აქციის ფონზე: როგორ დახვდნენ ბრიტანეთში აშშ-ის პრეზიდენტს
აშშ-ის პრეზიდენტი დონალდ ტრამპი, პირველ ლედისთან, მელანია ტრამპთან ერთად, მეორე სახელმწიფო ვიზიტით გაერთიანებულ სამეფოში ჩავიდა.
- "გაერთიანებულ სამეფოსთან ძალიან კარგი ურთიერთობა მაქვს. მათ სურთ ნახონ, შეუძლიათ თუ არა სავაჭრო შეთანხმების ოდნავ დახვეწა. დაინტერესებული ვარ, მათ დავეხმარო“, - განაცხადა ტრამპმა.
მისი თქმით, გაერთიანებული სამეფო განსაკუთრებული ადგილია.
"აქ ბევრი რამაა, რაც გულს მითბობს. მინდა გითხრათ. ეს ძალიან განსაკუთრებული ადგილია“, - აღნიშნა ტრამპმა.
პრეზიდენტი აშშ-ის ელჩის რეზიდენციაში, უინფილდ ჰაუსში განთავსდა.
დღეს მას უინძორის ციხესიმაგრეში მეფე ჩარლზი და სამეფო ოჯახის წევრების სრული შემადგენლობა უმასპინძლებს, მათ შორის დედოფალი კამილა. ხვალ კი პრემიერ-მინისტრთან, კირ სტარმერთან მოლაპარაკებებს გამართავს.
- აღსანიშნავია, რომ გაერთიანებულ სამეფოში ოთხი ადამიანი დააკავეს მას შემდეგ, რაც უინძორის ციხესიმაგრის ერთ-ერთი კოშკი აშშ-ის პრეზიდენტ დონალდ ტრამპისა და გარდაცვლილი ფინანსისტის, სექსუალური ტრეფიკინგის საქმეში ბრალდებული ჯეფრი ეპშტეინის ფოტოებით გაანათეს, - ინფორმაციას Reuters-ი ავრცელებს.
- მანამდე მომიტინგეებმა უინძორის ციხესიმაგრესთან ახლოს, სადაც დღეს გაერთიანებულ სამეფოში მყოფ აშშ-ის პრეზიდენტს მეფე ჩარლზი უმასპინძლებს, ტრამპისა და ეპშტეინის ფოტოებით უზარმაზარი ბანერი გამოფინეს.
პოლიციის განცხადებაში ნათქვამია, რომ ფოტოების უკანონოდ გამოფენის შემდეგ "მავნე კომუნიკაციაში ეჭვმიტანილი ოთხი ადამიანი დააკავეს.
აქციის მონაწილეებმა კოშკი ასევე გაანათეს აშშ-ის წარმომადგენელთა პალატის "დემოკრატი“ წევრების მიერ გამოქვეყნებული წერილის გამოსახულებითაც, რომელიც, წერილის გამავრცელებლების მტკიცებით, დონალდ ტრამპმა ჯეფრი ეპშტეინს დაბადების დღის მისალოცად 20 წელზე მეტი ხნის წინ გაუგზავნა, ასევე გამოსახეს ეპშტეინის მსხვერპლთა ფოტოები.
შეგახსენებთ, ფინანსისტ ჯეფრი ეპშტეინს სექსუალური ტრეფიკინგის საქმეზე ბრალი 2019 წელს წაუყენეს. ოფიციალური ცნობებით, ეპშტეინი ათობით არასრულწლოვანის სექსუალურ ტრეფიკინგს ეწეოდა. ეპშტეინმა ციხეში გარდაიცვალა. მიმდინარე წლის ივლისში აშშ-ის იუსტიციის დეპარტამენტმა განცხადება გამოაქვეყნა, რომელშიც ნათქვამია, რომ არ არსებობს "კლიენტების სია“ ან რაიმე მტკიცებულება იმისა, რომ ეპშტეინი ცნობილ ადამიანებს აშანტაჟებდა.