ABC-მ, ჩარლი კირკის მკვლელობასთან დაკავშირებით გაკეთებული კომენტარების გამო, ჯიმი კიმელის შოუ ეთერიდან მოხსნა - ტრამპი ამ ამბავს "შესანიშნავს" უწოდებს
ABC-მ, ჩარლი კირკის მკვლელობასთან დაკავშირებით გაკეთებული კომენტარების გამო, ჯიმი კიმელის შოუ ეთერიდან მოხსნა, - ინფორმაციას Reuters-ი ავრცელებს.
- Disney-ს მფლობელობაში არსებულმა ტელეკომპანია ABC-მ ჯიმი კიმელის შოუ - Jimmy Kimmel Live ეთერიდან განუსაზღვრელი ვადით მოხსნა.
"გასულ შაბათ-კვირას ახალ დაბალ დონეს მივაღწიეთ, MAGA-ს ბანდა სასოწარკვეთით ცდილობს ის ბავშვი, ვინც ჩარლი კირკი მოკლა, ერთ-ერთ მათგანად არ წარმოადგინოს. ყველაფერს აკეთებენ, რომ ამით პოლიტიკური ქულები დაიწერონ“, - განაცხადა კიმელმა.
კიმელის კომენტარების შემდეგ აშშ-ის ფედერალური კომუნიკაციების კომისიის თავმჯდომარემ, ბრენდან ქარიმ ადგილობრივ მაუწყებლებს მოუწოდა, რომ Jimmy Kimmel Live-ის პირდაპირ ეთერში გაშვება შეეწყვიტათ, წინააღმდეგ შემთხვევაში, კომისია გამოძიებას დაიწყებდა და მაუწყებლებს შეიძლება ლიცენზია დაეკარგათ.
- "ეს ახლა Disney-ისთვის ძალიან სერიოზული საკითხია. შეგვიძლია ეს გავაკეთოთ მარტივი ან რთული გზით“, - განაცხადა ქარიმ.
ABC-ის გადაწყვეტილებას აშშ-ის პრეზიდენტი, დონალდ ტრამპიც გამოეხმაურა.
"ეს ამერიკისთვის შესანიშნავი ამბავია. რეიტინგების პრობლემების მქონე ჯიმი კიმელის შოუ გაუქმდა. ვულოცავ ABC-ს, რომ მათ გამბედაობა ეყოთ ის გაეკეთებინათ, რაც აუცილებელი იყო“, - დაწერა ტრამპმა Truth Social-ზე.
- ასევე, დონალდ ტრამპმა ტელეკომპანია NBC-ს მოუწოდა, რომ ჯიმი ფელონისა და სეტ მეიერსის ღამის შოუების წინააღმდეგაც მსგავსი ნაბიჯები გადადგას.
ცნობისთვის, ივლისში CBS-მა სტივენ კოლბერის შოუს დახურვის შესახებ გამოაცხადა.