თავისუფლების მოედანზე გელა ხასაიას მხარდამჭერი აქცია გაიმართა - საპროტესტო აქციაზე იკრიბებიან პარლამენტთანაც
"გაათავისუფლეთ გელა ხასაია“, - ამ ლოზუნგით თავისუფლების მოედანზე საპროტესტო აქცია გაიმართა. აქციის მონაწილეებმა წმინდა გიორგის ობელისკის გარშემო ცოცხალი ჯაჭვი შეკრეს.
- გელა ხასაიას მხარდასაჭერად თავისუფლების მოედანზე სამოქალაქო აქტივისტები, ოპოზიციური პარტიის წევრები და აქციების დროს დაკავებული მოქალაქეების ოჯახის წევრები შეიკრიბნენ.
აქციის მონაწილეები აცხადებენ, რომ გელა ხასაია ციხეში "სუს-ის მიერ დაგეგმილი ოპერაციის შედეგად“ აღმოჩნდა. მათივე თქმით, ის და ყველა "სინდისის პატიმარი“ უნდა განთავისუფლდეს.
აქციაზე იკრიბებიან პარლამენტთანაც, დემონსტრანტების მოთხოვნები უცვლელია - დაინიშნოს ახალი არჩევნები და გათავისუფლდნენ აქციების ფარგლებში დაკავებული პირები.
აქციის მონაწილეებს ტრადიციულად ადგილზე მოტანილი აქვთ საქართველოსა და ევროკავშირის დროშები.
თბილისში 309-ე დღე, რაც საპროტესტო აქციები მიმდინარეობს.