ნახევარ მილიონზე მეტმა ამომრჩეველმა ხმა უკვე მისცა - რომელ რეგიონშია ყველაზე მაღალი მაჩვენებელი, 12:00 საათის მონაცემებით?
ცესკო-ს პრესსპიკერის, ნათია იოსელიანის განცხადებით, 12:00 საათის მონაცემებით, ქვეყნის მასშტაბით, საარჩევნო უბნებზე 602 445 ადამიანი მივიდა, რაც ამომრჩეველთა 17.15%-ია.
მისივე თქმით, საარჩევნო უბნებზე ხმის მიცემის პროცესი მშვიდ გარემოში მიმდინარეობს.
"12:00 საათისთვის, საარჩევნო უბნებზე 602 445 ამომრჩეველი მივიდა. ყველაზე მაღალი აქტივობა რაჭა-ლეჩხუმისა და ქვემო სვანეთის მხარეშია.
ასევე გაცნობებთ, რომ ამ დროისათვის საოლქო საარჩევნო კომისიებში საჩივარი არ შესულა“,- განაცხადა ნათია იოსელიანმა.
ამასთან, იოსელიანმა კიდევ ერთხელ განმარტა, რომ შეუძლებელია, ერთმა ამომრჩეველმა ხმა ორჯერ მისცეს.
„ერთი ამომრჩეველი არის ერთი ხმა და ხმის დუბლირება შეუძლებელია. შეუძლებელია, ერთმა ამომრჩეველმა სხვაგან მისცეს ხმა. ამას არ დაუშვებს ვერიფიკაციის აპარატი," - განაცხადა იოსელიანმა.
გარდა ამისა, მან შესაძლო დარღვევებთან დაკავშირებით „ლელო - ძლიერი საქართველოს" განცხადებებზე ისაუბრა და აღნიშნა, რომ ამ დროისთვის, არც ერთი საჩივარი არ დაწერილა და ამ საკითხზე მხოლოდ „საუბრები გვესმის".
„არც ერთი საჩივარი არ დაწერილა. არის მხოლოდ და მხოლოდ საუბარი სავარაუდო დარღვევებზე. ჩვენ მოვუწოდებთ სადამკვირვებლო ორგანიზაციებს, თუ არსებობს ფაქტები, დაწერონ საჩივარი საარჩევნო უბნებზე, რომელზეც დაუყოვნებლივი რეაქცია ექნება საარჩევნო ადმინისტრაციას. საუბარი ბევრი რამე შეიძლება, მაგრამ თქვენ იცით, რომ როცა საარჩევნო პროცესზე ვსაუბრობთ, მნიშვნელოვანია ფაქტები, უტყუარი დადასტურებები, რომელიც შეუწყობს ხელს იმას, რომ ადგილზე მოხდეს აღნიშნული გადაცდომების აღმოფხვრა და პროცესის იმგვარად გაგრძელება, რომ ამომრჩეველს ჰქონდეს შესაძლებლობა მშვიდ გარემოში მისცეს ხმა”, - აღნიშნა ნათია იოსელიანმა.
ამასთან, მან უპასუხა პარტია "გახარია საქართველოსთვის" წევრის, გიორგი შარაშიძის განცხადებას, რომ "ქართულ ოცნებას" არასამთავრობო ორგანიზაციების სახელით, ათასობით დამკვირვებელი ჰყავს რეგისტრირებული და აღნიშნა, რომ 'საარჩევნო ადმინისტრაციაში ყველა სადამკვირვებლო ორგანიზაცია კანონმდებლობის სრული დაცვით არის რეგისტრირებული".
ნახეთ ასევე: