"გადაეცით, რომ კიდევ ბევრი ნაჯახი მაქვს!" - იულია ვანის ინფორმაციით, მიხეილ ხუბუტია მას ემუქრება, რის გამო რუსეთიდან წასვლა სურს: დეტალები პროცესიდან

აპრილში მედიის ყურადღების ცენტრში მოექცა მოდელ იულია ვანის სასტიკი ცემის ფაქტი. თავდასხმაში ბრალდებული მისი ყოფილი პარტნიორი, მოსკოვის ოლქის ვაჭრობის ექს-მინისტრი მიხეილ ხუბუტია გახლდათ, რომელიც საყვარელსა და საკუთარი ქალიშვილის დედას თავს დაესხა. რუსული მედიის ცნობით, მამაკაცი მონანიების ნაცვლად, მუქარას აგრძელებს.

იულიამ თავდასხმის მომენტი ვიდეოზე ჩაიწერა, რომელიც მყისიერად გავრცელდა მედიასა და სოციალურ ქსელებში. თავდაპირველად, დაკავებული ხუბუტია ყველაფერს უარყოფდა და მომხდარს "სისულელეს" უწოდებდა. თუმცა, მოგვიანებით დანაშაული აღიარა და სასამართლოში ნებაყოფლობით გამოცხადდა. ამ დროისთვის, ყოფილმა ჩინოვნიკმა ბრალი მხოლოდ ჯანმრთელობის განზრახ საშუალო სიმძიმის დაზიანებაში აღიარა, ხოლო მისი ადვოკატები მკვლელობის მცდელობის მუხლს უარყოფენ.

თავდასხმა ნაჯახით და მუდმივი საფრთხე

ინციდენტის თვითმხილველების თქმით, როდესაც ხუბუტია ოდინცოვოს კოტეჯების დასახლებაში მდებარე აგარაკზე შეიჭრა, მას ხელში ნაჯახი ეჭირა.

სიტუაცია დღემდე დაძაბულია. იულია ვანი ყოფილი მამაკაცისგან მუდმივ მუქარას იღებს, რის გამოც ქვეყნის დატოვება გადაწყვიტა. მან სოციალურ ქსელში გამოაქვეყნა აუდიოჩანაწერი, რომელიც ბოლო სასამართლო სხდომის დროს გაკეთდა. ჩანაწერში ნათლად ისმის ხუბუტიას ხმა, რომელიც დაზარალებულის ადვოკატის თანაშემწეს მიმართავს: "გადაეცით, რომ მე კიდევ ბევრი ნაჯახი მაქვს!"

გაქცევის მიზეზებზე საუბრისას, მოდელი წერს: "მეგობრებო, მადლობა მხარდაჭერისთვის! ... სამწუხაროდ, იძულებული ვარ სასწრაფოდ დავტოვო ქვეყანა ბავშვთან ერთად. ისევ ყველაფერს ვტოვებ და შიშით გავრბივარ, რადგან მოქალაქე მიხეილ ხუბუტია კვლავ მემუქრება... ძალიან დავიღალე შიშში ცხოვრებით".

მუქარის შემცველი აუდიოჩანაწერის შემდეგ, იულიამ და მისმა ადვოკატებმა სამართალდამცავ ორგანოებს მიმართეს, თუმცა მათ განუცხადეს, რომ რადგან ხუბუტიას დანაშაული არ გაუმეორებია, პანიკაში ჩავარდნა არ ღირს. იულია ვანის თქმით, მას და მის დაცვას ეჭვი აქვთ, რომ ყოფილი მინისტრის ავტორიტეტის გამო, მას სათანადოდ არავინ იცავს.

"მიხეილი აგრძელებს ინტერნეტით სარგებლობას და ჩემი ღვინის ბრენდთან დაკავშირებული ანგარიშიდან მწერს მუქარებს და შეურაცხყოფას. ვინაიდან არავის შეუძლია აიძულოს ის ღირსეულად მოიქცეს, გადავწყვიტე, რომ მე და ჩემი შვილისთვის უმჯობესია, მაქსიმალურად შორს ვიყოთ მისგან", - ამბობს დაზარალებული.

"მკვდარს ვთამაშობდი" - გადარჩენის მცდელობა

გარდა მუდმივი საფრთხისა, იულიას ჯანმრთელობის სერიოზული პრობლემები აქვს. თავდასხმის შემდეგ მას დაუდგინდა ნაკვეთი ჭრილობები, რბილი ქსოვილების საშუალო და მესამე ხარისხის დაჟეჟილობები, აგრეთვე მარჯვენა ხელის მეოთხე და მეხუთე ძვლების მოტეხილობები. სრული რეაბილიტაციისთვის მას ოპერაცია და მკურნალობა ესაჭიროება, რასაც ხუბუტიას მუქარის გამო ვერ აგრძელებს.

იულიას ხშირად ეკითხებიან, როგორ მოახერხა ასეთი დაზიანებების მიღებისას თავდასხმის ვიდეოზე გადაღება. მოდელს ამაზე პასუხი აქვს: "მაშინვე დავიწყე ვიდეოს ჩაწერა, რადგან ვფიქრობდი - ვეღარ გადავრჩებოდი. ასევე მეგონა, რომ ის დაბრუნდებოდა და ბოლოს მომიღებდა. ... დაახლოებით რვა დარტყმა მომაყენა, შემდეგ გავიდა ოთახიდან, მალე ისევ დაბრუნდა და ცემა გააგრძელა. მაშინ თავი მოვიმკვდარუნე."

იულიას თქმით, ეს ვიდეოები მისთვის ერთადერთი საშუალება იყო, რომ საზოგადოებისთვის და მის ოჯახისთვის თავდამსხმელის ვინაობა დაემტკიცებინა.

ამ დროისთვის მიხეილ ხუბუტიას ათ წლამდე თავისუფლების აღკვეთა ემუქრება სამი მუხლით: მკვლელობის მცდელობა, ჯანმრთელობის საშუალო სიმძიმის დაზიანება და მკვლელობის მუქარა. ყოფილი ჩინოვნიკი გამოძიების დასრულებამდე შინაპატიმრობაში რჩება.

წაიკითხეთ ასევე:

• "მათი ურთიერთობა ჯოჯოხეთს ჰგავდა" - ვინ არის ქალი, რომელსაც მიხეილ ხუბუტია ცულით გაუსწორდა და რა არის ცნობილი ბიზნესმენის პირველ ოჯახსა და გარდაცვლილ ვაჟზე
• მიხეილ ხუბუტიას 10 წლამდე პატიმრობა ემუქრება - ქართული წარმოშობის ბიზნესმენის აღიარება და კადრები, რომელშიც ჩანს, როგორ მიდის ცულით ხელში იულია ვანის სახლში