გათავისუფლებული შვიდი მძევალი "წითელ ჯვარს“ გადაეცა, პარალელურად ღაზაში ჰუმანიტარული დახმარება შედის - რა ხდება სამშვიდობო შეთანხმების შემდეგ?
ღაზაში გათავისუფლებული პირველი შვიდი მძევალი წითელი ჯვრის საერთაშორისო კომიტეტს (ICRC) გადაეცა, - ინფორმაციას The Times of Israel-ი ავრცელებს.
- გამოცემის ცნობით, გათავისუფლებულ მძევლებს შორის არიან: გალი და ზივ ბერმანები, მატან ანგრესტი, ალონ ოჰელი, ომრი მირანი, ეიტან მორი და გაი გილბოა-დალალი.
წითელი ჯვრის საერთაშორისო კომიტეტი მძევლებს ისრაელელ სამხედროებს გადასცემს.
შეგახსენებთ, ღაზადან სულ 20 ცოცხალი მძევალი უნდა გაათავისუფლონ.
- ახლად გათავისუფლებულ მძევლებს ისრაელში დაბრუნების შემდეგ ისრაელის პრემიერ-მინისტრის, ბენიამინ ნეთანიაჰუს და მისი მეუღლის, სარა ნეთანიაჰუს ხელნაწერ წერილებს გადასცემენ.
„მთელი ისრაელის ხალხის სახელით, კეთილი იყოს თქვენი დაბრუნება! გელოდებოდით, გულში გიკრავთ. სარა და ბენიამინ ნეთანიაჰუ“, - აღნიშნულია წერილში.
გათავისუფლებულ მძევლებს ასევე გადასცემენ ტანსაცმელს, ლეპტოპებს, მობილურ ტელეფონებსა და პლანშეტებს.
წითელი ჯვრის საერთაშორისო კომიტეტის წარმომადგენლები ღაზას სექტორის ჩრდილოეთით შეხვედრის ადგილისკენ მიემართებიან, სადაც რამდენიმე მძევალს გადასცემენ.
- პარალელურად, ღაზაში ჰუმანიტარული დახმარება შედის. გავრცელებულ კადრებში ჩანს, რომ სამხრეთ ღაზას, რაფაჰის საზღვარზე, დახმარების სატვირთო მანქანების შედის.
როგორც დასავლური მედია წერს, მძევლების გათავისუფლების შეთანხმების პირობების თანახმად, ღაზაში დახმარების რაოდენობა უნდა გაიზარდოს - თუმცა, მსოფლიო სასურსათო პროგრამამ (WFP) შაბათს BBC-ს განუცხადა, რომ ღაზაში დახმარების სატვირთო მანქანების დიდი ნაკადი "ჯერ არ შესულა.
ჯერჯერობით უცნობია, რამდენი სატვირთო მანქანა შევიდა სამხრეთ ღაზაში მას შემდეგ, რაც პალესტინის ტერიტორიაზე პარასკევს ცეცხლის შეწყვეტის რეჟიმი ამოქმედდა.
პარალელურად timesofisrael-მა გაავრცელა ინფორმაცია, რომ მარტის შემდეგ ღაზაში პირველად შევიდა სამზარეულო მოხმარებისთვის გამოსაყენებელი გაზის მარაგი. დახმარება ასევე მოიცავს საკვებს, ფქვილს, ხილს და ხორცს