ექსპერტები: ალკოჰოლის მოხმარება ევროპაში კიბოს გამომწვევი ერთ-ერთი მთავარი მიზეზია
ალკოჰოლის მოხმარება ევროპაში კიბოს გამომწვევი ერთ-ერთი მთავარი მიზეზია. ამის შესახებ ინფორმაციას ჯანდაცვის მსოფლიო ორგანიზაციის კიბოს კვლევის სააგენტო ავრცელებს.
- ექსპერტების თქმით, ალკოჰოლის მოხმარების შეზღუდვის მიზნით სამთავრობო პოლიტიკის გაძლიერება, ყოველწლიურად სიკვდილიანობის მაჩვენებელს საგრძნობლად შეამცირებს. მხოლოდ ევროკავშირში, მსოფლიოში ალკოჰოლის ყველაზე მაღალი მოხმარების მქონე სუბრეგიონში, 2020 წელს კიბოს 111 000-ზე მეტი ახალი შემთხვევა დაფიქსირდა.
"ჯანდაცვის მსოფლიო ორგანიზაციის მონაცემებით, ევროპის რეგიონი და განსაკუთრებით ევროკავშირის ქვეყნები ძალიან მაღალ ფასს იხდიან ალკოჰოლისთვის, რაც ხელს უწყობს კიბოს განვითარებას. ჯანმრთელობისთვის ზიანის მიყენების გარდა, ეკონომიკური ზიანიც მნიშვნელოვანია," - განაცხადა დოქტორმა გუნდო ვეილერმა.
„ზოგი ალკოჰოლს „კულტურულ მემკვიდრეობას“ უწოდებს, თუმცა დაავადება და სიკვდილი ევროპული კულტურის ნაწილად არ უნდა იქნეს მიჩნეული“, - დასძინა მან.
კვლევის თანახმად, ალკოჰოლი ზრდის კიბოს სულ მცირე შვიდი სახეობის განვითარების რისკს, მათ შორის პირის ღრუს, ხახის, ხორხის, საყლაპავის, ღვიძლის, მსხვილი ნაწლავის და ქალის სარძევე ჯირკვლის კიბოს.
მკვლევარები თვლიან, რომ ალკოჰოლი კიბოს რამდენიმე მექანიზმით იწვევს, მათ შორის ჰორმონალური დონის შეცვლით, ნაწლავის მიკრობიომის ცვლილებებით და დნმ-ის დაზიანებით, რომელიც გამოწვეულია ოქსიდაციური სტრესით.
ანგარიშის თანახმად, ალკოჰოლთან დაკავშირებული კიბოს შემთხვევების უმეტესობა დაკავშირებულია „სარისკო“ სმასთან (დღეში ორიდან ექვს ჭიქამდე) და „ჭარბ“ სმასთან (დღეში ექვს ჭიქაზე მეტი). თუმცა, „ზომიერი“ ალკოჰოლის მიღებაც კი (დღეში ორ ჭიქაზე ნაკლები) 2020 წელს მსოფლიოში კიბოს 100 000-ზე მეტი ახალი შემთხვევის მიზეზი გახდა.
IARC-მა (კიბოს კვლევის საერთაშორისო სააგენტო) მოითხოვა ისეთი ზომების მიღება, როგორიცაა გადასახადების გაზრდა და ალკოჰოლის მოხმარებისთვის კანონით გათვალისწინებული ასაკის ამაღლება, ასევე ალკოჰოლური სასმელების საცალო ვაჭრობის სიმჭიდროვის შეზღუდვა, გაყიდვების საათების ან დღეების შეზღუდვა, ალკოჰოლური სასმელების მარკეტინგის აკრძალვა და მთავრობის მიერ კონტროლირებადი ალკოჰოლის გაყიდვების დანერგვა.
"ალკოჰოლის კიბოს რისკების შესახებ ცნობიერების ამაღლება და ის ფაქტი, რომ ალკოჰოლის არც ერთი დონე არ არის უსაფრთხო, კრიტიკულად მნიშვნელოვანია“, - განაცხადა დოქტორმა ბეატრის ლაბი-სეკრეტანმა, IARC-ის მტკიცებულებების სინთეზისა და კლასიფიკაციის განყოფილების უფროსის მოადგილემ.