ირანთან საერთაშორისო შეთანხმება, რომელიც მიზნად ისახავდა მსოფლიოს ატომური იარაღის გავრცელებისგან დაცვას, დასრულდა - თეირანმა შეთანხმების შეწყვეტის შესახებ განაცხადა
ირანთან 10 წლის წინ გაფორმებული საერთაშორისო შეთანხმება, რომელიც მიზნად ისახავდა მსოფლიოს ატომური იარაღის გავრცელებისგან დაცვას, ოფიციალურად დასრულდა - თეირანმა შეთანხმების შეწყვეტის შესახებ განაცხადა, - ინფორმაციას The Guardian-ი ავრცელებს.
- გამოცემის ცნობით, ირანის საგარეო უწყებამ განცხადება გაავრცელა, რომელშიც აღნიშნულია, რომ ქვეყანა აღარ არის შეზღუდული შეთანხმებით - ერთობლივი ყოვლისმომცველი სამოქმედო გეგმით (JCPOA), რომლის ფარგლებშიც თეირანს, ბირთვული პროგრამის შეზღუდვის სანაცვლოდ, საერთაშორისო სანქციები მოეხსნა.
"ამიერიდან ყველა დებულება, მათ შორის ირანის ბირთვული პროგრამის შეზღუდვები და მასთან დაკავშირებული მექანიზმები, შეწყვეტილად ითვლება“, - ნათქვამია ირანის საგარეო საქმეთა სამინისტროს განცხადებაში.
თუმცა, უწყებაში ირწმუნებიან, რომ ქვეყანა "მტკიცედ გამოხატავს დიპლომატიისადმი ერთგულებას“.
The Guardian-ი წერს, რომ ერთობლივ ყოვლისმომცველ სამოქმედო გეგმას, რომელსაც 2015 წელს ვენაში ხელი ირანმა, ჩინეთმა, გაერთიანებულმა სამეფომ, საფრანგეთმა, გერმანიამ, რუსეთმა და აშშ-მა მოაწერეს, მრავალწლიანი დიპლომატიური ჩიხი უნდა დაესრულებინა და ირანსა და დასავლეთს შორის ურთიერთობებში ახალი ეპოქა დაეწყო.