როგორ გაძარცვეს ლუვრი 10 წუთში - მშენებლების ფორმა ეცვათ, გამოიყენეს ხერხი და ძვირფასეულობა ყველას თვალწინ, მშვიდად მოიპარეს: დეტალები
19 ოქტომბერს მშენებლებად შენიღბულმა სამმა მძარცველმა, ვიზიტორების თვალწინ, ლუვრი გაძარცვა. მათ ფასდაუდებელი ნივთები მშვიდად, დიდი ძალისხმევის გარეშე მოიპარეს. როგორც ფრანგული მედია წერს, ეს იყო "სენსაციური, ელვისებურად სწრაფი ძარცვა".
დილის 9:30 საათზე, ხელოვნების მუზეუმის გახსნიდან ნახევარ საათში, მძარცველები მივიდნენ შენობის იმ ფასადთან, სადაც სარემონტო სამუშაოები მიმდინარეობდა. სატვირთო მანქანის კიბით (რომელიც იქ წინასწარ მიიყვანეს) მეორე სართულის ფანჯარასთან ავიდნენ, საიდანაც ლუვრში შესვლა შეძლეს. ბენზინზე მომუშავე ხერხით კი გაჭრეს ვიტრინა, რომელშიც მოთავსებული იყო ძვირფასეულობა.
- "ჩვენ გვაქვს მუზეუმის ვიდეოთვალთვალის სისტემის ჩანაწერები. არსებული მტკიცებულებები მიუთითებს მძარცველების მხრიდან მომზადებისა და ორგანიზების მაღალ ხარისხზე. მათ ძარცვისთვის 600 წამზე ნაკლები დრო დასჭირდათ", - აცხადებს საფრანგეთის კულტურის მინისტრი
ლუვრის შიდა სივრციდან გავრცელებულ ვიდეოში ჩანს ერთ-ერთი მძარცველი, რომელსაც აცვია სამშენებლო ობიექტებზე დასაქმებული ადამიანებისთვის განკუთვნილი მწვანე, ამრეკლავი ჟილეტი და ხერხის გამოყენებით მშვიდად ჭრის ვიტრინას, რომელშიც მოთავსებულია ძვირფასი ნივთები. ვიტრინების გასახსნელად გამოიყენეს ხერხი, რომლის ღირებულებაც 1300 დოლარია.
"გაძარცვეს ძალადობის გარეშე, პროფესიონალურად“, - განაცხადა საფრანგეთის კულტურის მინისტრმა და მძარცველები ამ საქმეში "გამოცდილ“ ადამიანებად მოიხსენია. მისივე ინფორმაციით, მოიპარეს 9 უძვირფასესი სამკაული.
- 9:40 წუთზე ორმა მძარცველმა შენობა კვლავ ამწეს საშუალებით დატოვა, დაბლა კი მესამე მძარცველი ელოდებოდათ. ამის შემდეგ სკუტერებზე დასხდნენ და შემთხვევის ადგილიდან მიიმალნენ, თუმცა საფრანგეთის ხელისუფლების ცნობით, გაქცევისას მათ რამდენიმე მნიშვნელოვანი მტკიცებულება დატოვეს.
როგორც Le Parisien წერს, მოპარული ნივთებიდან ერთ-ერთი, იმპერატრიცა ეუხენიას საიმპერატორო გვირგვინი, რომელიც 1300-ზე მეტ ბრილიანტს მოიცავს, მუზეუმის გარეთ გატეხილი იპოვეს. გამოცემის ცნობით, პოლიცია რამდენიმე წუთში მივიდა. მათ ადგილზე იპოვეს ხერხი, სატვირთო, ამრეკლავი ქურთუკები და ხელთათმანები.
მძარცველები დაკავებულები არ არიან. ბოლოს ისინი სათვალთვალო კამერამ დააფიქსირა თუ როგორ მიდიოდნენ სკუტერებით პარიზის ცენტრიდან სამხრეთ აღმოსავლეთის მიმართულებით. სამართალდამცველების თქმით, გამორიცხული არ არის, რომ მძარცველები უცხო ქვეყნის მოქალაქეები იყონ საფრანგეთის პრეზიდენტმა, ემანუელ მაკრონმა პირობა დადო, რომ მძარცველებსაც და ძვირფასეულობასაც მალე იპოვიან.
წაღებულ ნივთებს შორის არის ბრილიანტისა და საფირონის დიადემა, რომელიც ეკუთვნოდა საფრანგეთის უკანასკნელ დედოფალს, მარია ამალიას, ასევე წაღებულია საფირონის ყელსაბამი და საყურეები, რომელიც ნაპოლეონის მეორე ცოლს, მარია ლუიზას ეკუთვნოდა.
წაღებულია ძვირფასი ბროში და დიადემა, რომელიც იმპერატრიცა ეუხენიას ეკუთვნოდა. აღსანიშნავია, რომ 140-კარატიანი ბრილიანტი, რომელიც იმ ადგილას იყო, რომელიც გაძარცვეს, ქურდებმა ხელუხლებელი დატოვეს.