მექსიკის სილამაზის კონკურსის გამარჯვებული მკვლელობის ბრალდებით დააკავეს - რას წერს მედია?
მექსიკის სილამაზის კონკურსის გამარჯვებული მკვლელობის ბრალდებით დააკავეს - 32 წლის ვანესა გუროლას კრისტიან ესპინოზა სილვერის მკვლელობისთვის წაუყენეს ბრალი.
- სან დიეგოს ოლქის პროკურატურის პრესსპიკერის თქმით, ბრალდებული დანაშაულს არ აღიარებს. ის წინასწარი დაკავების იზოლატორში იმყოფება და სასამართლოს წინაშე 19 ნოემბერს წარდგება.
კრისტიან ესპინოზა სილვერს 2024 წლის 17 თებერვალს სან დიეგოში, ავტოფარეხში შესვლისას ესროლეს, თავდასხმის დროს ცეცხლსასროლი იარაღიდან გასროლის შედეგად დაიჭრა კიდევ ერთი ადამიანი 39 წლის მამაკაცი, რომლის ვინაობაც მედიისთვის უცნობია.
- სან დიეგოს პოლიციის იმდროინდელი განცხადებით, ეჭვმიტანილი, რომელიც შავ ქურთუკსა და შავ შარვალში იყო გამოწყობილი, მსხვერპლის მანქანასთან მივიდა და მოულოდნელად გაისროლა, შემდეგ კი გაუჩინარდა.
პოლიციის ცნობით, ორივე მამაკაცს ცეცხლსასროლი იარაღიდან მრავლობითი ჭრილობები ჰქონდა მიყენებული, სილვერი ქუჩაში მწოლიარე იპოვეს, ხოლო მეორე მამაკაცი ბინის ავტოფარეხის შესასვლელთან. სილვერი საავადმყოფოში მიყვანიდან მალევე გარდაიცვალა, მეორე დაშავებული კი გადარჩა.
თავდასხმის მოტივი გაურკვეველი რჩება.
ერთ-ერთი ვერსიის თანახმად, სროლა შესაძლოა გამოწვეული იყოს კალიფორნიის კონტროლისთვის მებრძოლი ნარკოკარტელებს შორის არსებული ომით.
მოკლული, ესპინოზა, ასევე ცნობილი როგორც "ელ ჩატო“. ვარაუდობენ, რომ ის ერთ-ერთი ნარკოკარტელის ხელმძღვანელის თანამზრახველი იყო.