"სი დაგვეხმარება, ერთად ვიმუშავებთ უკრაინის საკითხზე" - რა შედეგით დასრულდა დონალდ ტრამპისა და სი ძინპინის შეხვედრა, რომელსაც ტრამპი "10-დან 12 ქულით" აფასებს

აშშ-ის პრეზიდენტმა დონალდ ტრამპმა და ჩინეთის ლიდერმა სი ძინპინმა სამხრეთ კორეის ქალაქ ბუსანში შეხვდნენ. შეხვედრა უკვე დასრულდა.

• ჩინური მაუწყებლის, CCTV ცნობით, ორი ლიდერის შეხვედრა დაგეგმილზე მეტხანს, ერთ საათსა და 40 წუთს გაგრძელდა.

დონალდ ტრამპი შეხვედრის შემდეგ გიმჰაეს საერთაშორისო აეროპორტში გაემართა. მან სამხრეთ კორეაში ვიზიტი დაასრულა და აშშ-ში მიემგზავრება.

დონალდ ტრამპმა შეხვედრის შესახებ უკვე გააკეთა პირველი კომენტარი მედიასთან შეხვედრის შესახებ და მას "დიდი წარმატება" უწოდა. სავაჭრო მოლაპარაკებების გარდა, შეხვედრა უკრაინაში ომის საკითხსაც დაეთმო.

როგორც დონალდ ტრამპი აცხადებს, ის და სი ძინ პინი ერთად იმუშავებენ ომის დასრულების საკითხზე.

• "სი დაგვეხმარება და ჩვენ ერთად ვიმუშავებთ უკრაინის საკითხზე. ბევრი მეტი არაფრის გაკეთება შეგვიძლია“, - აღნიშნა ტრამპმა.

ამასთან, მისი თქმით, შეხვედრაზე ბევრ საკითხზე შეთანხმდნენ.

"საერთო ჯამში, ნულიდან 10-მდე შკალის მიხედვით, სადაც 10 საუკეთესოა, ვიტყოდი, რომ შეხვედრა 12-ზე იყო. ძალიან მნიშვნელოვანია, იცით, რომ მთელი ურთიერთობა ძალიან, ძალიან მნიშვნელოვანია და ვფიქრობ, რომ ეს მართლაც კარგი იყო“, - განუცხადა ტრამპმა ჟურნალისტებს Air Force One-ის ბორტზე.