მექსიკაში მოკლეს ქალაქის მერი - მას თავს დაესხნენ ურუაპანის ცენტრში, იქ შეკრებილი ათასობით ადამიანის თვალწინ
მექსიკის დასავლეთით, მიჩოაკანის შტატში, ურუაპანის მერი ათასობით ადამიანის თვალწინ, ქალაქის მთავარ მოედანზე იმ დროს მოკლეს, როცა ხალხი მიცვალებულთა დღის აღსანიშნავად იყო შეკრებილი.
- ურუაპანის მერი კარლოს ალბერტო მანსო როდრიგესი საავადმყოფოში გადაიყვანეს, სადაც გარდაიცვალა. თავდასხმის დროს ასევე დაშავდნენ საქალაქო საბჭოს წევრი და დაცვის წევრი.
მექსიკის ფედერალური უსაფრთხოების მდივანმა ომარ გარსია ჰარფუჩმა ჟურნალისტებთან განაცხადა, რომ მერს თავს დაესხა უცნობი პირი, რომელმაც მას შვიდჯერ ესროლა. მისივე თქმით, ეს თავდასხმა რეგიონში მოქმედ ორ კრიმინალურ დაჯგუფებას შორის შეიარაღებულ შეტაკებას უკავშირდებოდა.
მიჩოაკანი არის მექსიკაში ერთ-ერთი ყველაზე კრიმინალური შტატი და ფაქტობრივად, სხვადასხვა კარტელებსა და კრიმინალურ დაჯგუფებებს შორის ბრძოლის ველს წარმოადგენს - ისინი ერთმანეთს ებრძვიან ტერიტორიის, ნარკოტიკების გავრცელების მარშრუტებისა და სხვა უკანონო საქმიანობის კონტროლისთვის.
ბოლო თვეების განმავლობაში ურუაპანის მერმა სოციალურ ქსელში საჯაროდ ითხოვა დახმარება ამ კრიმინალურ ჯგუფებთან ბრძოლისთვის. მანვე შტატის გუბერნატორი, ალფრედო რამირეს ბედოლა და ასევე შტატის პოლიცია კორუფციაში დაადანაშაულა.