რომში, შუა საუკუნეების კოშკის ჩამონგრევისას დაშავებული მუშა საავადმყოფოში გარდაიცვალა
რომში, შუა საუკუნეების კოშკის ჩამონგრევის შედეგად დაშავებული მუშა საავადმყოფოში გარდაიცვალა.
- ტრაგიკული შემთხვევა კოლიზეუმის მახლობლად მოხდა. 66 წლის რუმინეთის მოქალაქე, ოქტავ სტროიჩი ნანგრევებში რამდენიმე საათის განმავლობაში იყო მოყოლილი. სასწრაფო დახმარების სამსახურმა მამაკაცი საავადმყოფოში გადაიყვანა, თუმცა მისი გადარჩენა ვერ მოხერხდა.
სამაშველო ოპერაციის განმავლობაში ის გონზე იყო და სასწრაფო დახმარების თანამშრომლებს ესაუბრებოდა. ადგილზე მისი მეუღლეც იმყოფებოდა. რუმინეთის საგარეო საქმეთა სამინისტრომ სამძიმარი გამოუცხადა გარდაცვლილის ოჯახის წევრებს.
სტროიჩი ვია დეი ფორი შუა საუკუნეების კოშკის რეკონსტრუქციაზე მუშაობდა. ეს კონკრეტული შენობა მრავალი წლის განმავლობაში ცარიელი და მიტოვებული იყო. რომის პროკურატურამ მომხდართან დაკავშირებით გამოძიება დაიწყო.
"როიტერის“ ცნობით, მაშველებმა ნანგრევებიდან კიდევ ერთი რუმინელი მუშა ამოიყვანეს, მის სიცოცხლეს საფრთხე არ ემუქრება.