"მტერმა მასშტაბური თავდასხმა განახორციელა" - რუსებმა დნეპროპეტროვსკის ოლქის ქალაქ კამენსკოეს დაარტყეს: დაშავდა 8 ადამიანი

რუსული ძალების მიერ დრონებით განხორციელებული თავდასხმის შედეგად, უკრაინის დნეპროპეტროვსკის ოლქის ქალაქ კამენსკოეში რვა ადამიანი დაშავდა და რამდენიმე ადგილას ხანძარი გაჩნდა, - ინფორმაციას უკრაინული მედია ავრცელებს.

• "მტერმა კამენსკოეზე დრონებით მასშტაბური თავდასხმა განახორციელა. რვა ადამიანი დაშავდა. ქალაქში რამდენიმე ხანძარი გაჩნდა. ოთხსართულიანი შენობის ერთ-ერთი შესასვლელის სახურავი და ჭერი ნაწილობრივ განადგურდა“, - განაცხადა დნეპროპეტროვსკის საოლქო-სამხედრო ადმინისტრაციის ხელმძღვანელის მოვალეობის შემსრულებელმა ვლადისლავ გაივანენკომ.

გარდა ამისა, დაზიანდა ქალაქის ინფრასტრუქტურა, სატრანსპორტო დაწესებულებები და ავტომობილები.

რუსებმა ასევე დრონებით შეუტიეს სინელნიკოვსკის რაიონში მდებარე პეტროპავლოვსკის თემს, სადაც კომუნალური დაწესებულების შენობაში ხანძარი გაჩნდა.

გაივანენკოს თქმით, საჰაერო თავდაცვის ძალებმა ოლქში 13 რუსული დრონი გაანადგურეს.