სარკინიგზო კატასტროფა სლოვაკეთში - ორი მატარებელი ერთმანეთს შეეჯახა და დაშავდა ათობით ადამიანი (ფოტოები)
სლოვაკეთში ორი მატარებელი ერთმანეთს შეეჯახა, რის შედეგადაც ათობით მგზავრი დაშავდა, - ინფორმაციას Reuters-ი სლოვაკეთის შინაგან საქმეთა მინისტრზე, მატუს სუტაჯ ესტოკზე დაყრდნობით ავრცელებს.
- მინისტრმა განაცხადა, რომ ათობით ადამიანი მსუბუქად დაშავდა, ხოლო 11 ადამიანი საავადმყოფოში გადაიყვანეს. ავარიის შედეგად არავინ დაღუპულა. ორივე მატარებლით, ჯამში, დაახლოებით 800 ადამიანი მგზავრობდა.
მატარებლების შეჯახება დედაქალაქ ბრატისლავასა და ქალაქ პეზინოკს შორის მოხდა.
ეს ბოლო თვის განმავლობაში სლოვაკეთში მომხდარი მეორე სარკინიგზო ავარიაა. 13 ოქტომბერს აღმოსავლეთ სლოვაკეთში ორი მატარებელი შეეჯახა ერთმანეთს, რის შედეგადაც 91 ადამიანი დაშავდა.