"რუსი პილოტების მოსყიდვას 3 მლნ დოლარად ცდილობდნენ" - გეგმა, რომლის მიხედვითაც, ეფ-ეს-ბეს მტკიცებით, უკრაინელები "მიგ-31“-ის გატაცებას აპირებდნენ
"კიევმა და ლონდონმა ვერ შეძლო რუსული ავიაგამანადგურებლის, "მიგ-31“-ის მოპარვა“, - ამის შესახებ "ეფ-ეს-ბე“ იტყობინება.
- რუსული დაზვერვის ინფორმაციით, "მოპარვის გეგმის აღკვეთით უკრაინული და ბრიტანული დაზვერვის მიერ მასშტაბური პროვოკაციის მცდელობა შეჩერდა“.
მათივე ცნობით, უკრაინის უშიშროება რუსი პილოტების მოსყიდვას ცდილობდა. ისინი შესრულებულ სამუშაოში 3 მილიონ დოლარს ჰპირდებოდნენ.
- კიევი ერთ-ერთ პილოტს დასავლური ქვეყნის მოქალაქეობასაც სთავაზობდა.
შემდგომ ისინი ეცდებოდნენ "მიგ-31“-ის რუმინული ქალაქის, კონსტანცის ნატოს ბაზისკენ მიმართვას, სადაც შეძლებდნენ მის ჩამოგდებას და პროვოკაციის მოწყობას.
"ეფ-ეს-ბეს“ ცნობით, ოპერაციაში მონაწილეობდნენ ნიდერლანდური საგამოძიებო ჟურნალისტების ჯგუფის, "Bellingcat”-ის წევრები.
ავიაგამანადგურებლის პილოტი ამბობს, რომ გასულ შემოდგომას მას ამ ჯგუფის წარმომადგენელი, სერგეი ლუგოვსკის სახელით დაუკავშირდა. მან საკუთარი პრეს-ბარათი გაუგზავნა და საომარ თემატიკაზე კონსულტაციისთვის ფული შესთავაზა. შემდგომ ურთიერთობაზე პილოტმა უარი განაცხადა.
- "ასე გამოდის, რომ კონტაქტზე გამოსვლის მიზანი ჩემი კომპრომეტირება იყო, რათა შემდგომ ეს დაზვერვას გამოეყენებინა“, - ამბობს პილოტი.
არხმა "როსია 24“-მა გამოაქვეყნა აუდიოჩანაწერი, რომელიც მათი ინფორმაციით, "ეფ-ეს-ბემ" მოიპოვა და სადაც, მათივე ცნობით, ისმის უკრაინული დაზვერვის თანამშრომლების მითითებები - როგორ ჯობია თვითმფრინავის გატაცება, რა სიმაღლეზე და სიჩქარეზე.
მოამზადა საბა ჩიტიაშვილმა