ნაპოვნია "შავი ყუთი" და მე-19 ცხედარი... - საქართველოს ტერიტორიაზე ჩამოვარდნილი თურქული თვითმფრინავის კატასტროფა: ბოლო სიახლეები
საქართველოსა და აზერბაიჯანის საზღვართან, 11 ნოემბერს მომხდარი თურქული სამხედრო-სატრანსპორტო თვითმფრინავის კატასტროფის ადგილზე სამძებრო სამუშაოები გრძელდება. მაშველებმა ბორტზე მყოფი 20 სამხედრო მოსამსახურიდან მე-19 ცხედარი იპოვეს, თუმცა ერთი ადამიანის ძებნა ამ დრომდე გრძელდება.
- ინციდენტთან დაკავშირებით გავრცელებული უმნიშვნელოვანესი ინფორმაციაა ის, რომ აღმოჩენილია თვითმფრინავის "შავი ყუთი". როგორც თურქული ტელევიზია NTV იუწყება, ბორტ-ჩამწერი გასაშიფრად და ინციდენტის მიზეზების დასადგენად თურქეთში გაიგზავნება.
"შავი ყუთის" პოვნა თურქეთის პრეზიდენტმა რეჯეფ თაიფ ერდოღანმაც დაადასტურა. მისივე თქმით, დაწყებულია გამოძიება.
“ჩვენი თვითმფრინავის შავი ყუთი ნაპოვნია და გამოძიებები დაწყებულია. დაღუპულთა 19 ცხედარი ვიპოვეთ. ბოლო ცხედრის ძიება გრძელდება. ამ პროცესის განმავლობაში, უპირველეს ყოვლისა აზერბაიჯანის პრეზიდენტ ალიევს ვესაუბრეთ და შემდეგ საქართველოს პრემიერ-მინისტრ კობახიძეს”, - განაცხადა ერდოღანმა.
თურქი ექსპერტები და ქართული გამოძიება
თურქეთის შეიარაღებული ძალების კუთვნილი C-130 Hercules-ის ტიპის თვითმფრინავი, რომელიც აზერბაიჯანიდან თურქეთის ქალაქ კაისერის მიმართულებით მიფრინავდა, 11 ნოემბერს ჩამოვარდა.
ადგილზე, საქართველოს სამაშველო და საპოლიციო ძალებთან ერთად, ორმოცამდე თურქი ექსპერტი და სამხედრო პირი მუშაობს.
ამ ეტაპზე, გამოძიების ძირითადი აქცენტი კატასტროფის ზუსტი მიზეზების დადგენაა, რაშიც უმნიშვნელოვანესი როლი სწორედ ნაპოვნ „შავ ყუთს“ ექნება.
რა არის ცნობილი გარდაცვლილ სამხედროებზე?
თურქეთის ეროვნულმა თავდაცვის სამინისტრომ ოფიციალურად დაადასტურა, რომ უმძიმესმა ტრაგედიამ 20 თურქი სამხედრო მოსამსახურის სიცოცხლე იმსხვერპლა. დაღუპულთა სიკვდილის შესახებ სამწუხარო ამბავი სამხედრო წარმომადგენლებმა რეკორდულ დროში მიიტანეს ოჯახებამდე, რასაც თურქეთის სხვადასხვა პროვინციაში ცრემლისა და ტკივილის ემოციური სცენები მოჰყვა - ქვეყანაში საყოველთაო გლოვაა გამოცხადებული.
ყველაზე ემოციური და გულში ჩამწვდომი დეტალი, რომელიც ტრაგედიის სიმძიმეს განსაკუთრებულად უსვამს ხაზს, ავიაციის ტექნიკური მომსახურების მთავარი სერჟანტის, ემრაჰ ქურანის მამასთან დაკავშირებული ამბავია. მუღლას პროვინციის ქალაქ მილასში მცხოვრებ ოსმან ქურანს შვილის დაღუპვა სამხედრო წარმომადგენელმა შემდეგი სიტყვებით ამცნო: "ოსმან ბიძია, შენ უკვე გმირის მამა ხარ, ჩვენი გული კი სამშობლოს სიყვარულით არის სავსე!"
წაიკითხეთ ასევე: