ევროპის აეროპორტებთან იდუმალი დრონები შენიშნეს - რას აცხადებს ნატო და რა არის "დრონების კედელი", რომლის ამოქმედებაც იგეგმება?

"უკრაინისგან შორს, დასავლეთ ევროპაში, აეროპორტების, სამხედრო ბაზებისა და ელექტროსადგურების გარშემო უიარაღო დრონები შენიშნეს, რაც რუსეთის მიერ წარმოებული "ჰიბრიდული ომის“ სავარაუდო პროგრამის ნაწილია.,“ - ამის შესახებ BBC თავის სტატიაში წერს სადაც აღნიშნავს, რომ ევროპის ნაწილების დასაცავად „დრონების კედლის“ შექმნა იგეგმება - მაგრამ რამდენად აუცილებელია ეს სინამდვილეში? და რაც მთავარია, რამდენად რეალისტურია?

მოსკოვის მიერ, უკრაინაში სრულმასშტაბიანი შეჭრის შემდეგ ევროპასა და რუსეთს შორის დაძაბულობის ზრდასთან ერთად, რუსეთს ე.წ. "ჰიბრიდული“ ან „ნაცრისფერი ზონის“ ომის სხვა ინციდენტებიც მიეწერება - ესენია კიბერშეტევები, დეზინფორმაციული კამპანიები, სატვირთო დეპოებში ცეცხლგამჩენი მოწყობილობების ჩასმა, წყალქვეშა კაბელების თვალთვალი და ზოგჯერ საბოტაჟი.

ამ თვის დასაწყისში ბაჰრეინში გამართულ უსაფრთხოების ფორუმზე, ნატოს სამხედრო კომიტეტის იტალიელმა თავმჯდომარემ, ადმირალმა ჯუზეპე კავო დრაგონემ, განაცხადა, რომ ნატოს ყველა თავდაცვის საჭიროებიდან, საჰაერო თავდაცვა უმთავრესი პრიორიტეტია.

9 სექტემბერს, პოლონეთის საჰაერო სივრცეში დაახლოებით 20 რუსული დრონი შენიშნეს, რის გამოც ქვეყნის ოთხი აეროპორტი დაიხურა. ეს უკრაინაში ომის დაწყების შემდეგ ნატოს საჰაერო სივრცის ერთ-ერთ ყველაზე მასშტაბურ და სერიოზულ დარღვევა იყო. სწორედ ამიტომ, შესაძლოა დრონების კედლის შესახებ დისკუსია სულ უფრო აქტუალური გახდეს.

„ეს იმპულსი ნამდვილად ბოლოდროინდელი შემოჭრით არის განპირობებული. დრონებმა - ან როგორც მათ ოფიციალური სახელით ვუწოდებთ, უპილოტო საჰაერო სისტემებმა (UAS ან UAV) - უკვე შეცვალეს საბრძოლო სივრცე“, - განმარტავს Chatham House-ის ანალიტიკური ცენტრის საერთაშორისო უსაფრთხოების პროგრამის უფროსი მკვლევარი კატია ბეგო.

დრონები ამ თვის დასაწყისში ბრიუსელის მახლობლად მდებარე ბელგიის მთავარ აეროპორტთანაც შენიშნეს. მსგავსი შემთხვევები ასევე დაფიქსირდა დანიაში, ნორვეგიაში, შვედეთში, გერმანიასა და ლიეტუვაში.

უკრაინაში განლაგებული რუსული თავდასხმის დრონებისგან განსხვავებით, დასავლეთ ევროპაში განლაგებული ეს „სამოქალაქო დრონები“ ჯერჯერობით არ არის აღჭურვილი ასაფეთქებელი ნივთიერებებით. თუმცა, ანონიმურად გაშვების გამო, ძნელია იმის დამტკიცება, თუ საიდან მოდის ისინი ან ვინ ააქტიურებს მათ.

ბელგია ერთ-ერთი მნიშვნელოვანი სამიზნეა, რადგან აქ მდებარეობს ნატოს შტაბ-ბინა და Euroclear (ფინანსური კლირინგის სახლი, რომელიც ტრილიონობით დოლარის საერთაშორისო ტრანზაქციებს ამუშავებს).

• დრონების კედლის აგების გეგმა

კედელი აღწერილია, როგორც ინტეგრირებული, კოორდინირებული, მრავალშრიანი თავდაცვითი სისტემა, რომელიც თავდაპირველად ბალტიის ქვეყნებიდან შავ ზღვამდე იქნება გადაჭიმული. სავარაუდოდ, ის მოიცავს რადარების, სენსორების, ჩამკეტი სისტემებისა და იარაღის სისტემების კომბინაციას შემომავალი დრონების აღმოსაჩენად.

გასაკვირი არ არის, რომ ის ქვეყნები, რომლებიც ყველაზე მეტად არიან დაინტერესებულნი მისი სწრაფი განლაგებით - მათ შორის პოლონეთი და ფინეთი - გეოგრაფიულად რუსეთთან ყველაზე ახლოს მდებარე ქვეყნები არიან.

„რუსეთის საზღვართან ახლოს მდებარე ქვეყნებისთვის - ბალტიისპირეთის ქვეყნებისთვის, პოლონეთისთვის, გერმანიისთვისაც, აბსოლუტურად აუცილებელია მსგავსი რამის შექმნის მცდელობა“, - ამბობს რობერტ ტოლასტი, უაითჰოლის ანალიტიკური ცენტრის, The Royal United Services Institute-ის (RUSI), მკვლევარი.

ევროკავშირის საგარეო პოლიტიკის ხელმძღვანელმა, კაია კალასმა, განაცხადა, რომ ახალი ანტიდრონული სისტემა სრულად 2027 წლის ბოლოსთვის უნდა ამოქმედდეს.

წყარო