"უპრეცედენტო დივერსიული აქტი" - რა მოხდა პოლონეთში, სარკინიგზო ხაზზე, რომელიც უკრაინის მომარაგებაში უმნიშვნელოვანესი არხია?
გასულ შაბათს, ვარშავიდან ლუბლინისკენ არსებულ სარკინიგზო ხაზის მიმდებარედ, მოქალაქეებმა აფეთქების ხმა გაიგონეს - ეს სარკინიგზო ხაზი მნიშვნელოვან როლს ასრულებს უკრაინის მომარაგების საკითხში.
- აფეთქების ხმის გაგონების შემდეგ მოსახლეობამ პოლიციაში დარეკა, ადგილზე სამართალდამცველები მივიდნენ, თუმცა ღამე იყო და დაზიანებული რელსები ვერ აღმოაჩინეს.
- შემთხვევა შეიძლება სავალალოდ დამთავრებულიყო, რომ არა მატარებლის მემანქანე, რომელმაც მეორე დღეს დროულად შეამჩნია რელსების დაზიანებული მონაკვეთი.
როგორ დაზიანდა რელსები, მართლა იყო თუ არა აფეთქება და ან რამ გამოიწვია ის - ამ დროისთვის უცნობია და აქტიური საგამოძიებო მოქმედებები მიმდინარეობს.
მომხდარს პოლონეთის პრემიერ-მინისტრი, დონალდ ტუსკი "საბოტაჟის უპრეცედენტო შემთხვევას" უწოდებს და აცხადებს, რომ შესაძლებელი იყო ყოველივეს კატასტროფული შედეგები გამოეწვია.
- შემთხვევას გამოეხმაურა სპეციალური სამსახურების მინისტრი ტომაშ სიმონიაკი, მისი თქმით, “არსებობს ძალიან მაღალი შანსი, რომ აფეთქების უკან მდგომი პირები უცხო ქვეყნის სპეცსამსახურების დავალებით მოქმედებდნენ“
სიმონიაკს რუსეთი პირდაპირ არ დაუსახელებია, თუმცა მედია წერს, რომ ეჭვი სწორედ რუსეთზეა.
მომხდარზე განცხადება გააკეთა პოლონეთის შინაგან საქმეთა ვიცე-მინისტრმა მაჩეი დუშჩიკმაც. მან საზოგადოებას ნაჩქარევი დასკვნების გაკეთებისგან თავის შეკავებისკენ მოუწოდა.
“რუსეთი იმდენად ძლიერი არ არის, რომ ყოველი ხანძრის ან მსგავსი შემთხვევის უკან ის იდგეს, თუმცა ამის გამორიცხვა ან უგულებელყოფა არ შეიძლება“, - აღნიშნა მან.