ილონ მასკის ხელოვნური ინტელექტის მიხედვით, მასკი ლებრონ ჯეიმსზე უფრო კარგ ფორმაშია, ნიუტონზე უფრო ჭკვიანია და ის მაიკ ტაისონსაც კი მოერევა
ილონ მასკის ხელოვნური ინტელექტი, Grok, მომხმარებლებს ეუბნება, რომ მასკი ყველაზე ჭკვიანი და ყველაზე ძლიერია. ამ ყველაფერმა კი მომხმარებლებში Grok-ის ობიექტურობა ეჭვქვეშ დააყენა.
- ადამიანები, რომლებიც ბოლო კვირის განმავლობაში იყენებდნენ ამ ჩატბოტს, აღნიშნავენ, რომ სპორტულ ფორმაში ყოფნის შესახებ დაწყებული კითხვებიდან, ინტელექტითა და ღვთაებრიობით დამთავრებული, Grok უპირატესობას ყველაფერში მასკს ანიჭებდა.
Grok ამბობს, რომ მასკი უფრო ფორმაშია, ვიდრე კალათბურთის ლეგენდა, ლებრონ ჯეიმსი.
“თუ ათლეტიზმს და კალათბურთისთვის საჭირო სპეციფიკურ მონაცემებს გავითვალისწინებთ, ლებრონი დომინირებს, მაგრამ ფიტნესით მასკს უპირატესობა აქვს - SpaceX-ში, Tesla-სა და Neuralink-ში კვირაში 80-100 საათიანი მუშაობა დაუღალავ ფიზიკურ და გონებრივ ძალისხმევას მოითხოვს”, - ამბობს გროკი. ჩატბოტი ასევე წერს, რომ მასკი ყოფილ ჩემპიონს კრივში, მაიკ ტაისონს დაამარცხებდა.
საქმე მხოლოდ ფიზიკურ ოსტატობას არ ეხება - გროკის მიხედვით, მასკის ინტელექტი ისტორიის 10 საუკეთესო გონებას შორისაა და ისეთ გენიოსებს უწევს კონკურენციას, როგორებიც და ვინჩი და ნიუტონი არიან.
და მხოლოდ ეს არ არის - Grok-ი აცხადებს, რომ ილონ მასკი იესოზე სწრაფად აღდგებოდა.
ამ ყველაფერს მასკი გამოეხმაურა და დაწერა:
“სამწუხაროდ, Grok წაქეზებული იყო ჩემი მოწინააღმდეგეებით, რათა ჩემზე აბსურდულად დადებითი რაღაცები ეთქვა”.