"არა ომს... მშვიდობა, მშვიდობა, მშვიდობა“ - აშშ-სთან უკიდურესად დაძაბული ურთიერთობის ფონზე ნიკოლას მადურო აცეკვდა (ვიდეო)

სოციალურ ქსელში ნიკოლას მადუროს სახალისო ვიდეო ვრცელდება. სტუდენტური დღისადმი მიძღვნილ ღონისძიებაზე ვენესუელის პრეზიდენტი სცენაზე ავიდა და თავისივე სიმღერის ფონზე იცეკვა.

• "სტუდენტების დღეა და ჩვენ აქ მათ მხარდასაჭერად ვართ. არა ომს... მშვიდობა, მშვიდობა, დიახ, მშვიდობა“, - თქვა მადურომ.

ამ ყველაფრის ფონზე კი, აშშ რეგიონში ზეწოლას აძლიერებს. ცნობისთვის, მიმდინარე წლის აგვისტოში ცნობილი გახდა, რომ აშშ-ის პრეზიდენტმა დონალდ ტრაპმა ნარკოკარტელების წინააღმდეგ სამხედრო ძალის გამოყენების ნებართვა გასცა.

აშშ-ის თავდაცვის მდივნის, პიტ ჰეგსეთის ბრძანებით, კარიბის ზღვაში მსოფლიოში ყველაზე მსხვილი ავიამზიდი USS Gerald Ford გაიგზავნა. კარიბის ზღვის სიახლოვეს აშშ-მა თავი მოუყარა სხვა სამხედრო ხომალდებსაც.

ბოლო ორი თვის განმავლობაში, აშშ-ის სამხედრო ძალებმა როგორც ატლანტიკურ, ისე წყნარ ოკეანეში, რამდენიმე ხომალდი გაანადგურა, რომლებიც, ტრამპის ადმინისტრაციის მიხედვით, ნარკოტრეფიკინგში იყვნენ ჩართულნი.