ასვი, აჭამე, დრო ატარებინე და ჰონორარიც მიეცი: კადიროვი ცნობილი სტუმრების ჩეჩნეთში ჩასვლისთვის დიდძალ ფულს იხდის - "არასდროს ვყოფილვარ ასე ნაქეიფარი, მეფესავით ვჭამდი“

ჩეჩნეთის რესპუბლიკის მეთაურის, რამზან კადიროვის რეზიდენცია გროზნოში წლების განმავლობაში იქცა მსოფლიო დონის ვარსკვლავების, განსაკუთრებით კი კრივისა და შერეული საბრძოლო ხელოვნების (MMA) მებრძოლების მასპინძლად. ვიზიტები ყოველთვის მსოფლიო მედიის ინტერესის საგანი ხდება და ხშირად დასავლეთის ქვეყნებში ადამიანის უფლებების დამცველთა კრიტიკასა და სკანდალებსაც იწვევს.

• ჯონ ჯონსი: ნასროლი RPG, შეძენილი ბინა და "მნიშვნელოვანი გარიგება“

ბოლო და ერთ-ერთი ყველაზე ხმაურიანი სტუმარი 2025 წლის შემოდგომაზე UFC-ის ყოფილი ჩემპიონი, ლეგენდარული ამერიკელი მებრძოლი ჯონ ჯონსი გახლდათ. ჯონსი, რომელიც მსოფლიოში ერთ-ერთი ყველაზე მაღალანაზღაურებადი სპორტსმენია, ჩეჩნეთში რამზან კადიროვის შვილის, ადამის 18 წლის იუბილეზე ჩავიდა.

ჯონსის ვიზიტის დეტალებმა მყისვე მიიპყრო ყურადღება:

როგორც თავად მებრძოლმა აღნიშნა, დღესასწაულზე მან ყუმბარმტყორცნიდან (RPG) და სხვა ეგზოტიკური იარაღიდან ისროლა, რაც მისთვის დაუვიწყარი გამოცდილება იყო.

"არასდროს ვყოფილვარ ასე ნაქეიფარი, მეფესავით ვჭამდი“, - დაწერა ჯონსმა სოციალურ ქსელში, რაც ხაზს უსვამს მასპინძლობის უპრეცედენტო დონეს.

ამერიკელმა მებრძოლმა გროზნოს ერთ-ერთ პრემიუმ კომპლექსში ბინაც შეიძინა. ჯონსმა ასევე დაადასტურა, რომ ჩეჩნეთში ჩაფრინდა "მნიშვნელოვანი გარიგების“ გასაფორმებლად და აღნიშნა: "მალე ხშირი სტუმარი გავხდები“.

ჯონსი მანამდე რუსეთში ზაფხულშიც იმყოფებოდა, როდესაც მოსკოვში IBA-ის ტურნირს დაესწრო, რის შემდეგაც, დანა უაითის ფავორიტმა, პენსიაზე გასვლის გადაწყვეტილება შეცვალა და UFC-ის ბრძოლების განახლება გამოაცხადა.

• MMA-ის ვარსკვლავები: მასტერკლასებიდან სამხედრო პოლიგონამდე

ჯონ ჯონსი კადიროვის რეზიდენციის ერთადერთი სტუმარი არ არის. ჩეჩნეთის ლიდერთან კონტაქტი არაერთ მსოფლიო კლასის მებრძოლს აქვს.

2015 წლის "სამეფო დახვედრა“ საშუალო წონის ჩემპიონობის პრეტენდენტ კრის უაიდმანს, მძიმეწონოსნები ფრენკ მირს და ფაბრისიო ვერდუმს მოუწყეს, რომლებიც გროზნოს საერთაშორისო ტურნირის სანახავად ეწვივნენ. მათ ჩაატარეს მასტერკლასი, ხოლო კადიროვთან ერთად ეროვნული ჩეჩნური სამოსით გადაიღეს ფოტოები. უაიდმანის თქმით, მათ "მეფეებივით ექცეოდნენ“. იმავე წელს გროზნოში ყოფილი ჩემპიონი ფრენკი ედგარიც ჩაფრინდა.

2022 წელს, ადამ კადიროვის დაბადების დღეზე, გროზნოში კერძო თვითმფრინავით ჩაფრიდნენ ჰენრი სეჰუდო, კამარუ უსმანი და ჯასტინ გეიჯი. მათ დღესასწაულში მონაწილეობის გარდა, ქალაქ გუდერმესში რუსეთის სპეცდანიშნულების უნივერსიტეტის ტერიტორიაზე ტაქტიკური სროლისა და სამხედრო მომზადების ილეთები დაამუშავეს. საყურადღებოა, რომ UFC-ის მებრძოლმა შონ ო’მეილიმ განაცხადა, რომ ამ ღონისძიებაზე მისვლის სანაცვლოდ 150 000 დოლარი შესთავაზეს, თუმცა მან უარი თქვა.

• კრივის ლეგენდები: ტაისონი და მეივეზერი

კრივის ლეგენდები კადიროვის სტუმრებს შორის ადრეულ ეტაპზევე გამოჩნდნენ:

მაიკ ტაისონი პირველად ჩეჩნეთს 2005 წელს ეწვია. არსებული ინფორმაციით, ამ ვიზიტისთვის მას 300 000 დოლარი გადაუხადეს. აეროპორტში "რკინის მაიკს“ ავტომატი გადასცეს და "მუსლიმ გმირად“ წარუდგინეს. ტაისონი გროზნოში მეორედ 2017 წელს, ბიზნეს-ფორუმის ფარგლებში ჩაფრინდა.

ფლოიდ მეივეზერი ერთ-ერთი ყველაზე მდიდარი და ტიტულოვანი მოკრივე გროზნოში ორჯერ, 2017 და 2018 წლებში იმყოფებოდა. 2018 წელს, ქალაქის 200 წლის იუბილეზე მანქანით გაისეირნა, რის შემდეგაც ის სპეცრაზმის პოლიგონზე წაიყვანეს, სადაც მან შტურმის შაშხანიდანაც ისროლა.

• სკანდალური ჰოლივუდი და დიდი ჰონორარები

სპორტსმენების გარდა, კადიროვის რეზიდენციას ჰოლივუდის ვარსკვლავებიც სტუმრობდნენ, რამაც განსაკუთრებით დიდი კრიტიკა გამოიწვია:

ჟან-კლოდ ვან დამი და ჰილარი სუონკი 2011 წელს კადიროვის 35 წლის იუბილესა და გროზნოს დღესასწაულზე მიიწვიეს. ვან დამმა საჯაროდ აღიარა სიყვარული კადიროვის მიმართ, სუონკს კი, დასავლური უფლებადამცველი ორგანიზაციების კრიტიკის გამო, თავისი ჰონორარის ქველმოქმედებაზე დახარჯვა მოუწია.

მევიოლინე ვანესა მეის გავრცელებული ინფორმაციით, ჩეჩნეთში ვიზიტისთვის 500 000 დოლარი გადაუხადეს.

• რა დგას ვარსკვლავების მიწვევების უკან?

ცნობილი სახეების, განსაკუთრებით კი ამერიკელი სპორტსმენების, მიწვევა ჩეჩნეთში რამზან კადიროვის მიერ გააზრებული ნაბიჯია. ამ ვიზიტების მთავარი მიზანია:

საერთაშორისო იმიჯის გაუმჯობესება - დასავლური მედიის მიერ ადამიანის უფლებების დარღვევის ფონზე, ვარსკვლავების სტუმრობა წარმოაჩენს ჩეჩნეთს, როგორც სტუმართმოყვარე, უსაფრთხო და განვითარებად ადგილს, რაც პირდაპირ ეწინააღმდეგება დასავლურ კრიტიკას.

რეგიონული გავლენა - სპორტსმენები, რომლებიც ხშირად საზოგადოების ახალგაზრდა ნაწილისთვის მისაბაძი მაგალითები არიან, აძლიერებენ კადიროვის ფიგურის კულტს რეგიონში და რუსეთის მასშტაბით.

პოლიტიკური ლეგიტიმაცია - ცნობილი სახეების მიერ გაკეთებული დადებითი განცხადებები კადიროვის მმართველობას ანიჭებს არაფორმალურ ლეგიტიმაციას საერთაშორისო ასპარეზზე.

ეს პრაქტიკა, მიუხედავად იმისა, რომ სკანდალებითაა მოცული, გრძელდება და ჩეჩნეთი კვლავაც რჩება რიგი მსოფლიო ვარსკვლავისთვის მიმზიდველ, თუმცა წინააღმდეგობრივ, დანიშნულების ადგილად.