ავსტრალიაში 16 წლამდე მოზარდებს სოციალური ქსელების გამოყენება აეკრძალათ - რას გულისხმობს ახალი კანონი

ავსტრალიაში 16 წლამდე ასაკის პირებს სოციალური ქსელების გამოყენება აეკრძალათ - აკრძალვის შემდეგ სოცმედიის პლატფორმებზე მილიონობით მოზარდის ანგარიში დაიბლოკება.

კანონის თანახმად Facebook-მა, Instagram-მა, Threads-მა, X-მა, YouTube-მა, Snapchat-მა, Reddit-მა, Kick-მა, Twitch-მა და TikTok-მა ოთხშაბათიდან ის ნაბიჯები უნდა გადადგან, რაც 16 წლამდე ავსტრალიელ მომხმარებელთა ანგარიშების წაშლასა და მათი ხელახალი რეგისტრაციისთვის ხელის შეშლას გულისხმობს.

კომპანიას, რომელიც ავსტრალიის მთავრობის მოთხოვნებს არ დაემორჩილება, შესაძლოა 49.5 მილიონ დოლარამდე ჯარიმა დაეკისროს.

• აკრძალვის ამოქმედებას თან გარკვეული სირთულეები ახლავს. Guardian Australia-მ უკვე მიიღო რამდენიმე შეტყობინება, რომ 16 წლამდე ბავშვებმა შეძლეს სახის ამოცნობის ასაკობრივი ტესტის გავლა, თუმცა როგორც ხელისუფლება აცხადებს, პირველივე დღეს იდეალურ შედეგს არც ელოდნენ. X-ის გარდა, ყველა ჩამოთვლილმა პლატფორმამ დაადასტურა, რომ აკრძალვას დაემორჩილება.

ბოლო კვირების განმავლობაში მოზარდები ასაკის დადასტურების პროცედურებს გადიოდნენ და ანგარიშების გაუქმებისთვის ემზადებოდნენ. ასაკის გადამოწმების სერვისის, k-ID-ის ავსტრალიელი ხელმძღვანელის, კირან დონოვანის განცხადებით, ბოლო კვირების განმავლობაში მათ ასობით ათასი მოზარდის ასაკობრივი შემოწმება ჩაატარეს.

აკრძალვასთან დაკავშირებით განსხვავებული დამოკიდებულება აქვთ თავად ბავშვების მშობლებს. ისინი ამბობენ, რომ ასაკის ამომცნობი აპლიკაცია ხშირად ცდება და არის შანსი, რომ 16 წლამდე მოზარდი 16+ ასაკის ადამიანად მიიჩნიოს.

ზოგიერთი მშობლის თქმით, ახალმა კანონმა, აიძულა შვილისთვის "კანონის დარღვევა ესწავლებინა":

"ვაჩვენე, როგორ მუშაობს VPN და სხვა გზები, რომელიც ასაკობრივი შეზღუდვების გვერდის ასავლელად გამოდგება, YouTube-ზე მიზანმიმართულად გავუხსენი ზრდასრულის ანგარიში, ვგეგმავ TikTok-ის ასაკის ამოცნობასაც ავუარო გვერდი და ასე გავაგრძელებ", - ამბობს ერთ-ერთი მშობელი.

• მშობელთა უმეტესობა ახალ კანონს მიესალმება. როგორც ერთ-ერთი მოზარდის დედამ განაცხადა “მისი შვილი სრულიად დამოკიდებული გახდა სოციალურ მედიაზე, აკრძალვის ამოქმედება კი მას საშუალებას აძლევს ბავშვი ამ პლატფორმებს ჩამოაშოროს“

ავსტრალიის მიერ მიღებულმა კანონმა მთელი მსოფლიოს მასშტაბით დიდი ყურადღება მიიპყრო.

მალაიზია, დანია და ნორვეგია უკვე აცხადებენ, რომ გეგმავენ მსგავსი აკრძალვები შემოიღონ. ევროკავშირმა ასევე მიიღო რეზოლუცია მსგავსი შეზღუდვების დასანერგად, ხოლო ბრიტანეთის მთავრობის წარმომადგენელმა მედიასთან საუბარში განაცხადა, რომ “ყურადღებით აკვირდებიან ავსტრალიის მიდგომას“

წყარო