"მნიშვნელოვანია, დაინახოთ, რას აკეთებს ახლა რუსეთი" - ოკუპანტებმა ოდესის ოლქში ენერგეტიკულ ინფრასტრუქტურას შეუტიეს: რას წერს ზელენსკი
რუსებმა ოდესის ოლქში ენერგეტიკულ ინფრასტრუქტურაზე მასშტაბური იერიში განახორციელეს, - ინფორმაციას უკრაინული მედია ქვეყნის საგანგებო სიტუაციების სამსახურზე დაყრდნობით ავრცელებს.
- უკრაინის სახელმწიფო საგანგებო სიტუაციების სამსახურის ცნობით, ოდესის ოლქში მდებარე ენერგეტიკული ობიექტების ტერიტორიასა და ტექსტილის საწყობებში ხანძარი გაჩნდა.
"მეხანძრეები მთელი ღამის განმავლობაში მუშაობდნენ. მიუხედავად მუდმივი საჰაერო განგაშისა, მაშველებმა სამოქალაქო გემზე გაჩენილი მასშტაბური ხანძარი ჩააქრეს“, - აცხადებს უკრაინის სახელმწიფო საგანგებო სიტუაციების სამსახური.
რუსული ძალების იერიშების შედეგად, სულ მცირე, 4 ადამიანი დაშავდა.
უკრაინის პრეზიდენტის ცნობით, რუსული ძალების იერიშების შემდეგ კიროვოგრადის, ნიკოლაევის, ოდესის, სუმის, ხარკოვის, ხერსონისა და ჩერნიგოვის ოლქებში ათასობით ადამიანი ელექტროენერგიის გარეშეა დარჩენილი.
"მნიშვნელოვანია, ყველამ დაინახოს, რას აკეთებს ახლა რუსეთი. ყოველი ნაბიჯი, რომელსაც ისინი ჩვენი ხალხის წინააღმდეგ ტერორის მიზნით დგამენ, ომის დასრულებისკენ მიმართული ნამდვილად არ არის. მათი მიზანი კვლავ ჩვენი სახელმწიფოს განადგურება და ჩვენი ხალხისთვის მაქსიმალური ტანჯვის მიყენებაა. სწორედ ამიტომ გვჭირდება მხარდაჭერა ადამიანების სიცოცხლის დაცვისა და ომის დასრულებით მიზნით, მათ შორის, საჰაერო თავდაცვის გაძლიერებით და რუსეთზე ზეწოლის გაზრდით. იმისთვის, რათა ჩვენმა დიპლომატიურმა ძალისხმევამ შედეგი გამოიღოს, ჩვენ ზეწოლა უნდა გავაძლიეროთ აგრესორზე, რათა მან ის ომი დაასრულოს, რომელიც თავად დაიწყო“, - წერს ზელენსკი X-ზე.
შეგახსენებთ, პარასკევს რუსულმა ძალებმა ოდესის ოლქის ჩერნომორსკის პორტში თურქული კომპანიის სატვირთო გემს დაარტყეს, რის შედეგადაც გემზე ხანძარი გაჩნდა და ერთი ადამიანი დაშავდა.