ტრაგედია ხანუქას დღესასწაულზე - ავსტრალიაში, სანაპიროზე, თავდამსხმელმა უმისამართო ცეცხლი გახსნა, დაიღუპა 12 ადამიანი
ავსტრალიაში, ბონდი ბიჩის სანაპიროზე სროლის შედეგად 12 ადამიანი დაიღუპა, - ინფორმაციას BBC-ი ახალი სამხრეთ უელსის შტატის პოლიციაზე დაყრდნობით ავრცელებს.
ახალი სამხრეთ უელსის პრემიერმა, კრის მინსმა დაადასტურა, რომ დაღუპული 12 პირიდან ერთ-ერთი თავდამსხმელია, მეორე ეჭვმიტანილი კი დაკავებულია.
პოლიციის ცნობით, ინციდენტის დროს სულ მცირე 29 ადამიანი დაშავდა, მათ შორის ერთი ბავშვი, საავადმყოფოში გადაიყვანეს. დაჭრილია 2 ოფიცერიც.
პრემიერ-მინისტრ ენტონი ალბანეზის განცხადებით, მომხდარი შოკისმომგვრელი და შემაძრწუნებელია.
ავსტრალიელ ებრაელთა აღმასრულებელი საბჭოს აღმასრულებელმა დირექტორმა, ალექს რივჩინმა, Sky News-თან ინტერვიუში განაცხადა, რომ სროლა ებრაული ზამთრის ფესტივალის, ხანუქას ღონისძიებაზე მოხდა.
„თუ ჩვენ განზრახ გავხდით ამ გზით სამიზნე, ეს ისეთი მასშტაბისაა, როგორსაც ვერცერთი ჩვენგანი ვერ წარმოიდგენდა. ეს საშინელებაა“, - აღნიშნა ალექს რივჩინმა.
ამასთან, ადგილობრივი პოლიციის თქმით, ჯერ კიდევ უცნობია, უკავშირდება თუ არა მომხდარი ხანუქას დღესასწაულს.
- ისრაელის საგარეო საქმეთა მინისტრის, გიდეონ საარის განცხადებით, სიდნეიში, ბონდი-ბიჩის სანაპიროზე ხანუქას ღონისძიებაზე მომხდარი სროლა ავსტრალიაში ბოლო ორი წლის განმავლობაში მიმდინარე ანტისემიტური არეულობის შედეგია.
მისი თქმით, ავსტრალიის მთავრობამ უამრავი გამაფრთხილებელი ნიშანი მიიღო და „გონს უნდა მოეგოს“.
შეგახსენებთ, ავსტრალიაში, ბონდი - ბიჩის სანაპიროზე სროლის შედეგად 10 ადამიანი დაიღუპა.