"ნივთიერება დავტესტეთ სადღაც 2009 წლამდე. ეს მოხდა იაღლუჯაზე" -  როგორ მოხვდა BBC -ის სკანდალურ საგამოძიებო ფილმში და რას ამბობს "გავრილოვის ღამეზე" შსს -ის ყოფილი თანამშრომელი?

BBC -ის სკანდალური საგამოძიებო ფილმის ერთ-ერთი რესპონდენტი არის შსს-ს განსაკუთრებულ დავალებათა დეპარტამენტის შეიარაღების განყოფილების ყოფილი უფროსი, ლაშა შერგელაშვილი, რომელიც იმ ნივთიერებებზე საუბრობს, რაც შესაძლოა გამოყენებული ყოფილიყო თბილისში საპროტესტო აქციების დაშლისას.

"ლაშა შერგელაშვილს, რომელსაც სახელმწიფო უსაფრთხოების სამსახური ედავება ძალიან სერიოზულ დანაშაულს სახელმწიფოს წინააღმდეგ, რომელიც თუ არ ვცდები, 2019 წლიდან აღარ მუშაობს შინაგან საქმეთა სამინისტროს სისტემაში, საუბრობს, რომ 2025 წლის ბოლოს რაღაცა გავანადგურეთ. ეს არასერიოზულია. რაც შეეხება აღნიშნულ ნივთიერებებთან დაკავშირებულ საკითხს - არაერთხელ განიმარტა, რომ შინაგან საქმეთა სამინისტროს 2007-2009 წელს ჰქონდა შეძენილი კონკრეტული ნივთიერებები. გაკეთდა განმარტება, თუ რა ნივთიერება იყო. იყო ერთ-ერთი ებრაული კომპანიის მხრიდან შეძენილი. არც ერთი მათგანი არ არის აკრძალული. ამაზეც გამოძიებამ გააკეთა შესაბამისი განმარტება. რაც შეეხება კონკრეტულ მტკიცებულებებს - როგორც სახელმწიფო უსაფრთხოების სამსახურმა განმარტა, 160-მდე საგამოძიებო მოქმედებაა ჩატარებული. შესაბამისად, ყველა ის მტკიცებულება, რომელიც რელევანტური იყო ამ საქმისთვის, ამოღებულია და დევს სისხლის სამართლის საქმეში. ამას ვერავინ გააქრობს, სანამ სისხლის სამართლის საქმის მასალების შენახვის ვადა არსებობს," - განაცხადა შინაგან საქმეთა მინისტრის მოადგილე ალექსანდრე დარახველიძემ.

მოგეხსენებათ. ფილმის გამოქვეყნების შემდეგ გამოძიება ორი მუხლით დაიწყო: პირველი, სამსახურებრივი უფლებამოსილების გადამეტება და მეორე, უცხოეთის ორგანიზაციისთვის მტრულ საქმიანობაში დახმარება. როგორც შინაგან საქმეთა სამინისტრომ განაცხადა შერგელაშვილი კი ფიგურირებს სხვა საქმეშიც, რომლის მიხედვითაც, 4 ოქტომბრის აქციისთვის, უკრაინიდან საქართველოში, სავარაუდოდ, საბრძოლო მასალა და ასაფეთქებელი ნივთიერებები შემოიტანეს, რასაც უკრაინაში მყოფი შერგელაშვილი სრულ აბსურდად აფასებს.

"ბევრი ვეძებე, მაგრამ ვერსად ვნახე ოფიციალურად წაყენებული ბრალდება, ჩემს წინააღმდეგ, მინისტრი დარახველიძე არასწორ ინფორმაციას ავრცელებს", - განაცხადა მან.

ლაშა შერგელაშვილი:

- არაერთ ადგილას დავრეკე მას შემდეგ, რაც გავიგე, რომ მინისტრის მოადგილე დარახველიძემ საჯაროდ დამადანაშაულა სიცრუის გავრცელებაში და ჩემი ქვეყნის საზიანო მოქმედებების განხორციელებაში. დავუკავშირდი ჩემს მეგობარ ადვოკატს და ვთხოვე, გარკვეულიყო ამ საქმეში, თუმცა ვერაფერი მოიძია, ამ ეტაპზე არც ბრალი მაქვს წაყენებული და არც საქმეა გადაცემული სასამართლოში. ამიტომ ვფიქრობ, რომ ეს იყო, უბრალოდ, საჯარო განცხადება, რომლის მიზანიც ჩემი დისკრედიტაცია, საზოგადოებრივი აზრის შეცვლის მცდელობა და შესაძლოა, დროის მოგებაც არის, რათა შემდეგ უკვე რაიმე საქმე "შეკერონ“.

- როგორ და რა ვითარებაში აღმოჩნდით BBC-ის საგამოძიებო ფილმის პროცესში ჩართული და რა კითხვები ჰქონდათ თქვენთან ქიმიური ნივთიერებების გამოყენებასთან დაკავშირებით?

- გაზაფხულზე დამიკავშირდნენ და გამომიგზავნეს ვიდეო, სადაც "ტვ პირველის“ ეთერში ვსაუბრობ ქიმიურ შენაერთებზე, როგორ მზადდებოდა ისინი და როგორ ათავსებდნენ წყლის ჭავლის მანქანებში. სწორედ ამ სიუჟეტთან დაკავშირებით ჰქონდათ შეკითხვები და მთხოვეს, ვიდეოკონფერენციის ფორმატში მესაუბრა ამ თემაზე. ეს საკმაოდ ხანგრძლივი პროცესი აღმოჩნდა. რამდენიმე კვირის განმავლობაში მზადდებოდა კითხვა-პასუხები. ჩემთვისაც მნიშვნელოვანი იყო დავრწმუნებულიყავი, ვინ იყვნენ ისინი, რადგან თავდაპირველად ქართულად მწერდნენ, თუმცა ტექსტი აშკარად თარგმნილი იყო და ეტყობოდა, რომ ავტორი ქართველი არ იყო. მოგვიანებით ჩავერთეთ ვიდეოკონფერენციაში და ამიხსნეს, რომ BBC ამზადებდა საგამოძიებო ფილმს საქართველოს შესახებ და მათ ჰქონდათ კონკრეტული კითხვები იმ ქიმიურ შენაერთებთან დაკავშირებით, რომელზეც მანამდე ვსაუბრობდი სატელევიზიო ეთერში. ამავე დროს, მათ მითხრეს, რომ საქართველოში ექიმებმა შეადგინეს პეტიცია და მიმართეს შინაგან საქმეთა სამინისტროსა და ჯანდაცვის სამინისტროს თხოვნით, გაეცათ პასუხი - რა ნივთიერება გამოიყენეს და რა შეურიეს წყალს, რადგან ბევრი ადამიანი დაზარალდა, არსებობდა მოწამვლის ნიშნები და ექიმებს უჭირდათ ზუსტი დიაგნოზის დასმა.

პასუხები უწყებებისგან არ ჰქონდათ და მკითხეს, შემეძლო თუ არა დახმარება იმის გარკვევაში, რა ნივთიერება შეიძლებოდა ყოფილიყო გამოყენებული. ვუთხარი, რომ ვეცდებოდი გამერკვია. მართლაც მოვიძიე საქართველოში არსებული ინფორმაცია, შევისწავლე მსგავსი შემთხვევები, დავადგინე ამ ქიმიური შენაერთის შესაძლო დასახელებები და მათ გადავუგზავნე. ამის შემდეგ გაგრძელდა დამატებითი დაზუსტებები, ხშირი მიმოწერა და კომუნიკაცია. საბოლოოდ ისინი უკრაინაში ჩამოვიდნენ. შეხვედრისას განმიმარტეს, რომ შესაძლოა გამოყენებული ყოფილიყო გაცილებით მომწამვლელი ნივთიერებები, რომელთა გამოყენება დაუშვებელია საპროტესტო აქციებზე და მით უმეტეს საკუთარი მოსახლეობის წინააღმდეგ. ამასთან აღნიშნეს, რომ კვლევა კვლავ გრძელდებოდა და საბოლოო დასკვნის გამოტანა მაშინ ჯერ კიდევ შეუძლებელი იყო. მოგვიანებით მკითხეს, დავთანხმდებოდი თუ არა ინტერვიუს ჩაწერას.

დეტალურად ამიხსნეს ყველა შესაძლო რისკი, მათ შორის ისიც, რომ ხელისუფლება შეეცდებოდა ჩემს დისკრედიტაციასა და გაშავებას. მე თავად ვიკითხე, რამდენად მნიშვნელოვანი იყო ჩემი მონაწილეობა ამ ფილმში. მათ მითხრეს, რომ ჩემი ინფორმაციის საფუძველზე შეიცვალა ფილმის თავდაპირველი გეგმა და გრაფიკი, რადგან საქმე გაცილებით სერიოზული და სკანდალური აღმოჩნდა, ვიდრე თავიდან ეგონათ.

ჩემი მონაწილეობა მათ გამოძიებას მეტ დამაჯერებლობას სძენდა და საბოლოოდ ეს იმ ადამიანებს დაეხმარებოდა, ვინც აქციების დროს დაზარალდა. ამიტომ დავთანხმდი. ინტერვიუ ჩავწერეთ და ფილმის გამოსვლამდე დაახლოებით ორი კვირით ადრე მომწერეს და მითხრეს, რომ დაადგინეს იმ ქიმიური შენაერთის სავარაუდო სახელი. მათი შეფასებით, ეს იყო ე.წ. "კამიტი“ ნივთიერება, რომელიც პირველად მსოფლიო ომის დროს გამოიყენებოდა და მოგვიანებით, 1920-იან წლებში, აშშ-ში მომიტინგეების წინააღმდეგაც ჰქონდათ გამოყენებული.

მათ განმიმარტეს, რა შესაძლო დაავადებებს იწვევს ეს შენაერთი და რა საფრთხეებთან არის დაკავშირებული. სწორედ მაშინ მივიღე უკვე ამ ქიმიური ნივთიერების შედგენილობისა და მოქმედების უფრო ზუსტი და პროფესიული სურათი.

- ანუ ამბობთ, რომ ხელისუფლება ცილს გწამებთ?

- ფაქტობრივად, ასე გამოდის. გამოვიდა ფილმის ანონსი, რომელშიც ჩანდა, რომ ჟურნალისტს ინტერვიუს ვაძლევ. მეორე დღესვე ხელისუფლების წარმომადგენელი გამოვიდა და რაღაცაში დამადანაშაულა. ეს თუ ცილისწამება არ არის, მაშინ რა არის? ამ დრომდე ზუსტად არც კი ვიცი, რას მედავებიან. ჩემი აზრით, ამ ცილისწამების მთავარი მიზანია იმ ადამიანების დაშინება, რომლებიც დღეს საქართველოში იმყოფებიან და ვისთანაც მთელი ამ დროის განმავლობაში მქონდა ურთიერთობა. სწორედ ამ ადამიანებიდან ვიღებდი ინფორმაციას და ვაგროვებდი ცნობებს, BBC-ის საგამოძიებო ფილმისთვის. ეს გზავნილი მათკენ არის მიმართული, რომ თუ რაიმე "არასასურველი“ მოხდება, მათაც აუცილებლად ჩართავენ ამ საქმეში და გაასამართლებენ სამშობლოს ღალატისა და ხელისუფლების დამხობის მუხლით.

- შინაგან საქმეთა მინისტრის მოადგილე დარახველიძე ამბობს, რომ არასერიოზულია, შსს-ს ყოფილი თანამშრომელი, რომელიც სისტემაში 2019 წლიდან აღარ მუშაობს, საუბრობს იმაზე, რომ უწყებამ 2025 წლის ბოლოს მტკიცებულებები გაანადგურა...

- როდესაც შინაგან საქმეთა მინისტრის მოადგილე განცხადებას აკეთებს, მინიმუმ უნდა გადაამოწმოს მაინც ინფორმაცია. შინაგან საქმეთა სამინისტროდან 2021 წლის 1-ელ დეკემბერს გავთავისუფლდი და არა 2019 წელს, როგორც მან ითქვა. რაც შეეხება იმას, თუ საიდან ვფლობ ინფორმაციას, იმის შესახებ თუ რა მოხდა უწყებაში 2025 წელს, შეისწავლონ ჩემი საქმიანობა და პასუხი თავადაც გაეცემათ.

- რას გულისხმობთ?

- ჩემს პროფესიულ გზას და იმ ავტორიტეტს, რომელიც შინაგან საქმეთა სამინისტროში მქონდა, განსაკუთრებით იმ დანაყოფში, სადაც ვმსახურობდი. ეს ყველაფერი შესაძლებლობას მაძლევს ისიც ვიცოდე, როგორ მოქმედებს სუს-ი დღეს და დიდი ალბათობით, როგორ იმოქმედებენ მომავალშიც.

- BBC-სთან საუბრისას თქვენ ახსენეთ, რომ 2009 წელს მონაწილეობდით კონკრეტული ნივთიერების ტესტირებაში, რომლის გამოყენებასაც დემონსტრაციების დროს გეგმავდნენ. რა იყო ეს ნივთიერება, როგორ იმოქმედა თქვენზე და რა განსხვავება ჰქონდა მის ზემოქმედებას იმ საშუალებებთან შედარებით, რაც მანამდე გქონდათ გამოცდილი?

- ჩვენ ეს ნივთიერება დავტესტეთ 2009 წელს ან 2009 წლამდე. ეს მოხდა იალღუჯაზე. ჩვენ ყოველთვის ვტესტავდით ნებისმიერ საშუალებას იმისათვის, რომ გაგვეგო, მისი რეაქცია როგორი იქნებოდა. ტესტირების დროს იქ მარტო მე არ ვყოფილვარ, სხვებიც იყვნენ, მაგრამ ამ შენაერთების შემცველობა ძალიან ცოტა ადამიანმა იცოდა. მე ვიცოდი იმიტომ, რომ პასუხისმგებელი ვიყავი, ვინაიდან ჩემს აღრიცხვაზე იყო. იცოდა ჩემმა ხელმძღვანელობამ, რომელიც ზემოდან აკვირდებოდა ამ პროცესებს და მათ შორის კიდევ მაღალი თანამდებობის პირებმა. ამ პროცესში, როდესაც ჩვენ აღმოვაჩინეთ, რომ ეს გაცილებით ძლიერი იყო, ვიდრე მანამდე მიღებული რომელიმე წიწაკის გაზი, არაერთხელ რომ გვქონდა დატესტილი, მოვახსენეთ, რომ ასეთი პროცესები იყო. ადამიანს ხანგრძლივად უვითარდება მოწამვლის პროცესი, შემდეგ ემართება ღებინება და ა.შ. ჩვენ ტესტირების მომენტში შევთავაზეთ, რომ არ იქნებოდა ამის გამოყენება სასურველი და სხვათა შორის, მაშინვე თქვეს, რომ არ გამოვიყენოთო... აქედან გამომდინარე, მოხდა ამის დალუქვა.

- შინაგან საქმეთა სამინისტროდან თქვენი წამოსვლის მიზეზი რა იყო?

- ისეთი მდგომარეობა შეიქმნა, რომ ფაქტობრივად, ვეღარ ვგრძნობდი თავს სისტემის სრულფასოვან წევრად. სამსახურში უბრალოდ ვიჯექი, ასე ვთქვათ, მხოლოდ ხელფასის ასაღებად. ყველა ის საქმე, რაც მევალებოდა, ფაქტობრივად ჩამომაცილეს. პირდაპირ მითხრეს, შენ არაფერს აკეთებ, არსად არავინ გიშვებს, შენ წინააღმდეგ არავინ არაფერს გეგმავს, უბრალოდ იყავი და იჯექიო.

- როგორ ფიქრობთ, რატომ?

- იმ პერიოდისთვის რამდენიმე მიზეზი არსებობდა. ერთ-ერთი იყო ე.წ. გავრილოვის ღამესთან დაკავშირებული მოვლენები. მეორე მიზეზი კი ჩემი დამოკიდებულება მაშინდელი ხელმძღვანელობის მიმართ. სიმართლე რომ ვთქვა, მათ ჩემთან ურთიერთობა კომფორტულად არ ეჩვენებოდათ. საქმე ის არის, რომ როდესაც გარკვეულ დავალებებს გაძლევენ, ზოგჯერ იქ ისეთი ელემენტებიც ჩნდება, რაც კანონის გვერდის ავლას გულისხმობს, იმისთვის, რომ კონკრეტულ საკითხზე ვინმემ თვალი დახუჭოს და საქმე "გაამართლონ“. მე ასეთი ადამიანი არ ვიყავი და მათ ჯგუფში არ ვეწერებოდი. მესამე მიზეზზე, ჯერ არ მინდა საჯაროდ საუბარი, ალბათ ამის დროც მოვა. ამ ყველაფრის ფონზე გადავწყვიტე, სისტემიდან წამოვსულიყავი, თუმცა თავიდან ამის საშუალებას არ მაძლევდნენ. საბოლოოდ, როცა მკაფიოდ დავიჟინე წასვლა, გასაუბრებაზე დამიბარეს ხელმძღვანელთან. იქ პირდაპირ მითხრეს, რომ არ სურდათ, შემდეგ ვინმეს ეთქვა, რომ თითქოს სამსახური ძალით დამატოვებინეს. მე შევპირდი, რომ მსგავს არაფერს ვიტყოდი და ასე დასრულდა ეს პროცესი, 2021 წლის 1 - ელ დეკემბერს ოფიციალურად დამითხოვეს.

- თქვენ, რა თქმა უნდა იცით, სტრასბურგის სასამართლომ, პოლიტიკა ე.წ. გავრილოვის ღამის საქმეზე რამდენიმე დარღვევა დაადგინა. გიორგი გახარია კი ჯერ კიდევ არ ამბობს სიმართლეს, თქვენ როგორც პროცესის უშუალო მონაწილეს, რისი თქმა შეგიძლიათ, რა მოხდა სინამდვილეში იმ ღამეს?

- "გავრილოვის ღამე" თავიდან ბოლომდე კატასტროფა იყო. პირველი შეცდომა იქიდან დაიწყო, რომ გავრილოვი ჩამოიყვანეს და პარლამენტის თავმჯდომარის სავარძელში ჩასვეს, რამაც სრულიად ბუნებრივი და ადეკვატური პროტესტი გამოიწვია საზოგადოების მხრიდან. გარწმუნებთ, ანალოგიური უკმაყოფილება იყო სამართალდამცველებში და მათ შორის იმ დანაყოფშიც, სადაც მე ვმსახურობდი. იმ დროს მე ვიყავი განსაკუთრებულ დავალებათა დეპარტამენტის პირველი სამმართველოს შეიარაღების ქვეგანყოფილების უფროსი. პრობლემა მხოლოდ ერთ კონკრეტულ მოვლენაში არ იყო. ეს იყო შინაგან საქმეთა სამინისტროს არაკომპეტენტურობის შედეგი. ადამიანებს ნიშნავდნენ არა პროფესიონალიზმის მიხედვით, არამედ იმის მიხედვით, რამდენად ერთგულები იყვნენ და რამდენად მზად იყვნენ ამა თუ იმ ბინძური დავალების შესასრულებლად. სწორედ ეს არის სისტემური პრობლემა და არა ის, რომ იქ კარგი, განათლებული და პროფესიონალი ადამიანები არ მუშაობდნენ, ისინი მუშაობდნენ, მაგრამ მათ აზრს არავინ ეკითხებოდა. შედეგად მივიღეთ ის საშინელება, რაც მოხდა. ადამიანებს თვალები დაუზიანდათ იმ ვაზნებით, რომლებიც ადრე ამოღებული იყო ხმარებიდან და მიუხედავად ამისა, გაურკვეველი მიზეზით კვლავ დაბრუნდა გამოყენებაში. სხვათა შორის, ჩემმა დანაყოფმა ეს ვაზნები არ გამოიყენა. ეს იყო ჩვენი ერთობლივი გადაწყვეტილება, შევთანხმდით, რომ ამ ტიპის საშუალებებს ხალხის წინააღმდეგ არ გამოვიყენებდით.

შემიძლია გითხრათ, რომ ამ საქმეში გიორგი გახარიას პასუხისმგებლობა, რა თქმა უნდა, არსებობს. პირადად მე არ ვიცი, ვინ გასცა კონკრეტული ბრძანება. რაც ზუსტად ვიცი, ის არის, რომ ადგილზე იმყოფებოდა შინაგან საქმეთა მინისტრის პირველი მოადგილე, მისი გვარი, სამწუხაროდ, აღარ მახსოვს. ჩემი ვარაუდით, ადგილობრივ პროცესებს სწორედ ის მართავდა. იყო ერთი კონკრეტული მომენტი, როცა განვითარებული სიტუაცია არ მომეწონა და მივედი დეპარტამენტის დირექტორთან, ვუთხარი, რომ აუცილებელი იყო გარკვეული ზომების მიღება. მან კი მითხრა, რომ არაფერს წყვეტდა და მინიშნება მინისტრისკენ გააკეთა.

- მაშინ დეპარტამენტის ხელმძღვანელი ვინ იყო?

- გიორგი ყაყიჩაშვილი.

- რაციაში ვისი ბრძანება ისმოდა?

- რაციაში მე მხოლოდ გიორგი ყაყიჩაშვილის ხმა მესმოდა, რომელიც ყვიროდა - "ნუ ისვრით, ნუ ისვრით“. სხვა ბრძანება არ მომისმენია. - ალბათ გაქვთ თქვენი ვერსია, რა შეიძლება მომხდარიყო - რა თქმა უნდა, მაქვს ჩემი ვერსია, როდესაც ხალხის რაოდენობა მნიშვნელოვნად გაიზარდა, ანუ ბევრად მეტი ადამიანი გამოვიდა, ვიდრე ველოდით, სიტუაცია დაიძაბა. ასეთ პირობებში გადაწყვეტილებას ქვედა რგოლში ვერ მიიღებდნენ, წესით, გაზის კაფსულების გამოყენების ბრძანება უნდა გაეცა შინაგან საქმეთა მინისტრს. ადგილზე იყო მცხეთა-თბილისის და მცხეთა-მთიანეთის სამმართველოები, შესაძლებელია, მესამე სამმართველოც იყო ჩართული, თუმცა ზუსტად არ ვიცი. ვფიქრობ, აქედან რომელიმე დანაყოფს მისცეს მითითება, რომ გაესროლათ რამდენიმე - 3 - 4 გაზის ვაზნა. დანარჩენმა სპეცრაზმელებმა ეს რომ დაინახეს, იფიქრეს, რომ ისინიაც ასე უნდა მოქცეულიყვნენ და დაიწყეს სროლა, ვისაც რა ჰქონდა - გაზის თუ რეზინის ტყვიები. ამან ხალხი გააბრაზა და აგრესიაზე გადმოვიდნენ, ვფიქრობ, ამის შემდეგ უკვე ოფიციალურად გასცეს ბრძანება ყველას ესროლა იმ საშუალებიდან, რაც ხელთ გააჩნდათ.

- ალბათ ამ მომენტში გადაიღეს ოპერატორებმა, იმ პერიოდისთვის ძალიან პოპულარული კადრი, რომელშიც ჩანს, რომ თქვენ იარაღზე ხელი აუკარით კოლეგას, რომელიც აქციის მონაწილეებს რეზინის ტყვიებს დამიზნებით ესროდა...

- ეგ სპონტანურად მოხდა. მას ხელში ეჭირა გაზის ვაზნა, რომლის გასროლის არეალი დაახლოებით 70-დან 100 მეტრამდეა. იქიდან გამომდინარე, რომ ის ამ ვაზნას ახლოს მდგომ ადამიანს უმიზნებდა, აშკარა იყო, რომ გასროლის შემთხვევაში შეიძლებოდა სერიოზული ზიანი მიეყენებინა მისთვის. სწორედ ამიტომ ავუკარი ხელი.

- უკრაინაში როდის წახვედით?

- 2021 წლის დეკემბერში ხომ სამსახურიდან გამათავისუფლეს, ხოლო ორ თვეში, ანუ 2022 თებერვალში ომი დაიწყო. უკრაინაში მეგობრები მყავდა, მათთან მუდმივი კონტაქტი მქონდა, მიყვებოდნენ როგორ არ ინდობდნენ რუსები ბავშვებს, მოხუცებს, ქალებს... განსაკუთრებით იმოქმედა ჩემი მეგობრის სიტყვებმა, - ლაშა, თუ შეგიძლია, ჩამოდი, ყველას დახმარება გვჭირდებაო.

სწორედ მაშინ მივიღე საბოლოო გადაწყვეტილება და წავედი. ამის შემდეგ ძალიან მალე გავხდი არასასურველი ადამიანი საქართველოს ხელისუფლებისთვის. დაახლოებით ერთ წელიწადში დაიწყო ჩემი დისკრედიტაციის მცდელობები. მანამდე ჟურნალისტებთან ურთიერთობაც კი არ მქონდა, თუმცა მოგვიანებით ერთი-ორი ინტერვიუ ჩავწერე და, როგორც ჩანს, ესეც არ მოეწონათ.

- როცა თქვენ ომში ჩაერთეთ, ამერიკა უფრო აქტიური და მოტივირებული იყო უკრაინის მხარდასაჭერად, დღეს ვითარება მნიშვნელოვნად შეცვლილია. ამ კონტექსტში როგორ აფასებთ მიმდინარე პროცესებს, როგორია თქვენი მოტივაცია და როგორ პასუხობთ ნარატივს, თითქოს უკრაინელი ხალხი "გაწირეს“?

- მთლიანობაში, ომის ფუნდამენტური ცვლილება არ მომხდარა. ის, რაც დღეს უფრო აქტიურად განიხილება უკრაინულ საზოგადოებაში, დაკავშირებულია შეერთებული შტატების ინიციატივასთან. ლაპარაკია იმაზე, რომ ამერიკამ შესთავაზა უკრაინის პრეზიდენტს საპრეზიდენტო არჩევნების ჩატარება, ტრამპი ხვდება, რომ რუსეთთან მშვიდობის მიღწევა არსებული ფორმატით შეუძლებელია და უკრაინის ტერიტორიების დათმობის ხარჯზე სურს ამ საკითხის მოგვარება. უკრაინა ასეთ პირობებს ვერ დათანხმდება, შეუძლებელია, ერთმა ადამიანმა ქვეყნის ტერიტორიები დათმოს. სწორედ ამიტომ გაჩნდა არჩევნების თემა. მე მოვისმინე პრეზიდენტ ზელენსკის განცხადება, რომელშიც თქვა, რომ მზად არის არჩევნების ჩასატარებლად, თუმცა ამასთან ერთად მოითხოვა, რომ შეერთებულმა შტატებმა აიძულოს რუსეთის ფედერაცია მინიმუმ 160 დღით შეაჩეროს საომარი მოქმედებები. თუ ცეცხლის რეალუად შეწყდება უკრაინაში არჩევნების ჩატარება შესაძლებელი გახდება. ზელენსკიმ ასევე აღნიშნა, რომ თავად შესაძლოა არც კი მიიღოს მონაწილეობა ამ არჩევნებში.