"თქვენ ხართ ექიმი სიკვდილი, კლინიკა სასაფლაოდ აქციეთ" - საფრანგეთში სამუდამო პატიმრობა მიუსაჯეს ექიმს, რომელმაც 30 პაციენტი მოწამლა: მათ შორის 12 გარდაიცვალა
საფრანგეთში, ანესთეზიოლოგს სამუდამო პატიმრობა მიესაჯა 30 პაციენტის განზრახ მოწამვლისთვის. ამ პაციენტებიდან 12 მოწამვლის შედეგად გარდაიცვალა.
ფრედერიკ პეშიეს ყველაზე ახალგაზრდა მსხვერპლი 4 წლის ბავშვი იყო, ხოლო ყველაზე დიდი 89 წლის. გამოძიების ინფორმაციით, ანესთეზიოლოგი პაციენტებს უკეთებდა ისეთ ნივთიერებას, რაც გულის გაჩერებას, ან სისხლდენას იწვევდა.
"თქვენ ხართ ექიმი სიკვდილი, მკვლელი და ყველა ექიმს არცხვენთ. თქვენ კლინიკა სასაფლაოდ აქციეთ", - ასე მიმართა ექიმს სასამართლოზე პროკურორმა.
- ფრედერიკ პეშიეს საქმეზე გამოძიება რვა წლის წინ დაიწყო. ის 2008-2017 წლების განმავლობაში, ბეზანსონის კლინიკაში პაციენტების მოწამვლაში იყო ეჭვმიტანილი.
ფრედერიკის საქმე მას შემდეგ გახმაურდა, რაც ყურადღება მიიქცია 36 წლის პაციენტის, სანდრა სიმარდის ამბავმა. ხერხემლის ოპერაციის დროს სანდრას უეცრად გული გაუჩერდა, ის გადარჩა, თუმცა კომაში ჩავარდა. ანალიზებმა აჩვენა, რომ მის ორგანიზმში კალიუმის კონცენტრაცია მოსალოდნელზე 100-ჯერ მეტი იყო. ამის შემდეგ დაიწყო გამოძიება.
"მე ეს ადრეც მითქვამს და კიდევ ვიტყვი - მე ყოველთვის ვიცავდი ჰიპოკრატეს ფიცს“, - ამბობდა ანესთეზიოლოგი.
აღსანიშნავია, რომ გამოძიებისა და სასამართლო პროცესის განმავლობაში ის დაკავებული არ ყოფილა.