"ჯერ ბომბები ააფეთქა, შემდეგ კი ხალხს დანით დაესხა თავს" - ტაივანის მეტროში თავდამსხმელმა სამი ადამიანი მოკლა
ტაივანის დედაქალაქ ტაიპეიში, დანით შეიარაღებული თავდამსხმელის მიერ განხორციელებული ტერაქტის შედეგად, სულ მცირე სამი ადამიანი დაიღუპა და ცხრა დაშავდა.
- ტაივანის პრემიერ-მინისტრ ჩო ჯუნგ-ტაის თქმით, 27 წლის ეჭვმიტანილმა კვამლის ბომბები ტაიპეის მთავარ მეტროსადგურში ააფეთქა, შემდეგ კი ხალხმრავალ სავაჭრო უბანში მდებარე სხვა სადგურზე გაიქცა და გზად ხალხს დანით თავს დაესხა. თავდასხმა ადგილობრივი დროით დაახლოებით 17:20 საათზე (09:20 GMT) მოხდა.
სოციალურ მედიაში გავრცელებულ ვიდეოებში ჩანს, როგორ გარბის პანიკაში მყოფი ხალხი შემთხვევის ადგილიდან, შავ ტანსაცმელში გამოწყობილი პირი კი კვამლის ბომბებს ისვრის დატვირთულ ქუჩაზე.
ეჭვმიტანილი მოგვიანებით მრავალსართულიანი შენობიდან გადმოვარდნის შემდეგ გარდაიცვალა. დანაშაულის მოტივი ჯერჯერობით გაურკვეველია. ადგილობრივი მედიის ცნობით, ეჭვმიტანილი ნასამართლევი იყო და ძებნაში იმყოფებოდა.
ამ ტიპის თავდასხმები ტაივანში იშვიათია. ქვეყანაში ძალადობრივი დანაშაულის დაბალი მაჩვენებელია. ბოლოს მსგავსი ინციდენტი ტაიპეიში ათ წელზე მეტი ხნის წინ, 2014 წელს მოხდა.