“ყველა ზრუნავს, როგორ გააფერადოს ნაძვის ხე - მე კი ვდარდობ, იქნებ ჩემს შვილს თანამდგომი გამოუჩნდეს “ - 33 წლის ჯაბა მურცხვალაძეს საზოგადოების დახმარება ესაჭიროება

33 წლის ჯაბა მურცხვალაძეს საზოგადოების მხარდაჭერა ესაჭიროება.

როგორც მისი მამა, გოგიტა მურცხვალაძე აცხადებს, წლებთან ერთად, ჯაბას მშობლების ჯანმრთელობაც გაუარესდა, მიუხედავად ამისა, მშობლებს ყველაზე მეტად შვილის ბედი და ჯანმრთელობა აწუხებთ.…

გოგიტა მურცხვალაძე: - ჯაბა 3 დღის იყო, სამშობიაროს თანამშრომელს ხელიდან რომ გაუვარდა. ამის შემდეგ მისი მკურნალობაც არასწორი მეთოდით წარიმართა. ეს ამბები ჩემთვის ძნელი გასახსენებელია. შშმ შვილი მყავს და კარგად მესმის იმ ოჯახების, სადაც ასეთი ბავშვები იზრდებიან.

- დღეს როგორ ცხოვრობთ?

- მე და ჩემი მეუღლეც მოვხუცდით.…ამას წინათ პრეზიდენტს გავუგზავნე წერილი, ვთხოვდი, რომ მისი მეშვეობით პირველ ლედისთან, ქალბატონ თამარ ბაგრატიონთან დაკავშირებას. ვთხოვდი ქალბატონ თამარს, დახმარების მიზნით საქველმოქმედო ღონისძიება დაეგეგმა.

- პასუხი რა იყო?

- დამირეკა ქალბატონმა ადმინისტრაციიდან და მშრალად მითხრა, საშუალება არა გვაქვსო. გულსატკენია, ყველაზე ცუდ შემთხვევაში სიტყვიერ თანადგომას მაინც ველოდი. შარშან ბათუმში ვმკურნალობდი, თუმცა შედეგი ნულის ტოლია. მაქვს ეჭვი, რომ არასწორად მიმკურნალეს, ეს ეჭვი გამოვთქვი ჯანდაცვის მინისტრის სახელზე დაწერილ ჩემს წერილში, მაგრამ ჯერ პასუხი არ მიმიღია.

რამდენიმე წელი აჭარის მთავრობის მეთაურისა და ქალაქის მერის სახელზე განცხადებას განცხადებაზე ვწერდი ხვეწნა-მუდარით, რომ ჯაბასთვის ადაპტირებული ლიფტი გაეკეთებინათ. რომ ვერაფერს გავხდი, ცაგერის რაიონ სოფელ ჩხუტერში, საიდანაც წარმოშობით ვარ, ბიძაშვილების, თანასოფლელებისა და კეთილი ხალხის დახმარებით პატარა, 60 კვადრატი სახლი დავდგი და შვილს კიბის მაგივრად ადაპტირებული შესასვლელი მოვუწყვე. ეს ჯაბასთვის შვება იყო, ყოველდღე სუფთა ჰაერზე გამყავდა. ერთადერთი პრობლემა, 430 მეტრი გზა არის დასაგები. ვის არ ვთხოვე, მაგრამ შედეგს ვერ მივაღწიე.

ერთადერთი "კვირის პალიტრის", "ambebi.ge-ს და მათი მკითხველის ემპათიას ვგრძნობ. ხალხი რომ არ მედგას გვერდში, არ ვიცი, დღემდე როგორ მოვიდოდით. წლებია მათი თანადგომით ვზრუნავ ჩემს შვილზე. ახლა ჯაბა 33 წლისაა... მძიმე ეპილეფსიური შეტევების გამო ყოველდღიური მედიკამენტოზური მკურნალობა სჭირდება. მეც ინვალიდი ვარ, მეუღლეც... პენსიაზე ვართ და რომ არა საზოგადოების დახმარება, არ ვიცი, რა გვეშველებოდა.

წლის ბოლო თვეა, ახალ წლამდე 2 კვირამდე დარჩა. ყველა ზრუნავს, როგორ გააფერადოს ნაძვის ხე, მე კი იმაზე ვდარდობ, რომ ჩემს შვილს ეგება გამოუჩნდეს თანამდგომი, რომ წამლები და მკურნალობა არ მოაკლდეს.

თიბისი ბანკი

ჯაბა მურცხვალაძის დასახმარებლად

GE45TB7420136080100007

საქართველოს ბანკი

ჯაბა მურცხვალაძის დასახმარებლად

GE42BG0000000162421607