ჩინეთის “წყლის ბომბი“ - გასაიდუმლოებული პროექტი, რომელიც ჰიმალაის მთებში მსოფლიოში ყველაზე დიდი ჰიდროელექტროსადგურის აგებას გულისხმობს: მედიამ დეტალების გარკვევა შეძლო
ჩინეთი ტიბეტში მსოფლიოში ყველაზე დიდ ჰიდროელექტროსადგურს ააშენებს. გავრცელებული ინფორმაციით, კაშხალი მდინარე Yarlung Tsangpo-ს ქვედა ნაწილში განთავსდება. 168 მილიარდი დოლარის ღირებულების ჰიდროელექტროსადგური მსოფლიოში ნებისმიერ სხვა სისტემაზე მეტ ელექტროენერგიას გამოიმუშავებს.
პროექტის მშენებლობამ შეშფოთება გამოიწვია ინდოეთსა და ბანგლადეშში გარემოზე ზემოქმედების გამო. გაზეთებმა და მედიამ პროექტს პოტენციური “წყლის ბომბი“ უწოდა. ვარაუდობენ, რომ პროექტმა შესაძლოა, მნიშვნელოვნად შეცვალოს ბუნებრივი ლანდშაფტი და დააზიანოს ადგილობრივი ეკოსისტემა. ხოლო ჩინეთ-ინდოეთის სადავო საზღვართან მისი სიახლოვე კაშხალს ბირთვული იარაღის მქონე სახელმწიფოებს შორის კონფლიქტის მიზეზად აქცევს.
ამ რისკების მიუხედავად, პროექტი კვლავ საიდუმლოებითაა მოცული.
„ეს არის ყველაზე დახვეწილი, ინოვაციური კაშხლის სისტემა, რაც კი მსოფლიოს ოდესმე უნახავს. ის ასევე ყველაზე სარისკო და პოტენციურად ყველაზე საშიში პროექტია“, - განაცხადა ბრაიან ეილერმა, ვაშინგტონში მდებარე სტიმსონის ცენტრის ანალიტიკური ცენტრის ენერგიის, წყლისა და მდგრადობის პროგრამის დირექტორმა.
ჩინეთის საგარეო საქმეთა სამინისტრომ განაცხადა, რომ პროექტს "ჩაუტარდა სიღრმისეული კვლევა“ და „განხორციელდა საინჟინრო უსაფრთხოებისა და ეკოლოგიური დაცვის საფუძვლიანი ზომები იმის უზრუნველსაყოფად, რომ ის უარყოფითად არ იმოქმედებს დინების ქვედა ნაწილებზე“. განცხადებაში ასევე აღნიშნულია, რომ "პროექტის მიზანია სუფთა ენერგიის განვითარების დაჩქარება, ადგილობრივი მოსახლეობის საარსებო წყაროების გაუმჯობესება და კლიმატის ცვლილების წინააღმდეგ აქტიური ბრძოლა“.
გასულ წელს გამოქვეყნებულ ნაშრომში პეკინის უნივერსიტეტის მეცნიერებმა მოითხოვეს, რომ „კაშხლის პროექტის დაწყებამდე სასწრაფოდ ჩატარდეს ბიომრავალფეროვნების ფართომასშტაბიანი კვლევები“, რათა „სათანადოდ გამოვლინდეს ადგილობრივი ბუნების ღირებულება და ზუსტად შეფასდეს კაშხლის გარემოზე ზემოქმედება“.
მსოფლიოში ყველაზე მაღალი დინების მქონე მდინარე იარლუნგ ცანგპო ჰიმალაის მყინვარიდან იმ პლატოზე გადადის, სადაც ბუდიზმი იყო გავრცელებული და ქვეყნის უკიდურეს სამხრეთ კიდემდე მიემართება. ამ დაღმართს წელიწადში დაახლოებით 300 მილიარდი კილოვატ-საათის ელექტროენერგიის გენერირების პოტენციალი აქვს.