შვედეთში ძლიერ ქარიშხალს 3 ადამიანის სიცოცხლე ემსხვერპლა - დასახლებები ელექტროენერგიის გარეშე დარჩა, გაუქმდა რკინიგზის მოძრაობა: რა ხდება ქვეყანაში ბოლო მონაცემებით
სკანდინავიურ ქვეყნებში დამტყდარი ძლიერი ზამთრის ქარიშხლის შემდეგ, შვედეთში 3 ადამიანი დაიღუპა. შტორმმა ასევე გამოიწვია სამგზავრო შეფერხებები და ელექტროენერგიის გათიშვა.
ადგილობრივი მედიის და პოლიციის ცნობით, ქვეყნის სამხრეთით, კუნსბერგეტის სათხილამურო კურორტზე, 50 წლის მამაკაცს ხე დაეცა და ადგილზე გარდაიცვალა. კიდევ უფრო ჩრდილოეთით მდებარე რეგიონულმა კომპანია "ჰემაბმა" განაცხადა, რომ მათი ერთ-ერთი თანამშრომელი სამუშაო ადგილზე უბედური შემთხვევის შედეგად გარდაიცვალა.
პოლიციამ ასევე განაცხადა 60 წლამდე ასაკის მამაკაცის შესახებ, რომელსაც ტყეში მუშაობისას აგრეთვე ხე დაეცა და მოგვიანებით საავადმყოფოში გარდაიცვალა.
- შტორმის შედეგად შვედეთში, ნორვეგიასა და ფინეთში ათიათასობით სახლი ელექტროენერგიის გარეშე დარჩა. ქარიშხლის გამო გზები და რკინიგზის სამსახურიც შეფერხდა.
Helsinki Times-ის ცნობით, ჩრდილოეთ ფინეთში, კიტილას აეროპორტში რეისები გადაიდო მას შემდეგ, რაც ძლიერმა ქარმა სამგზავრო თვითმფრინავი და უფრო პატარა თვითმფრინავი ასაფრენი ბილიკიდან თოვლის გუბეში გადააგდო. გაზეთის ცნობით, Swiss Air-ის თვითმფრინავი, რომელსაც დაახლოებით 150 მგზავრი გადაჰყავდა, ჟენევიდან ახალი დაშვებული იყო და ჯერ კიდევ მოძრაობდა, როდესაც გზას გადაუხვია. უფრო პატარა თვითმფრინავი, 400XT მოდელი, იმავე დროს მიწაზე იმყოფებოდა და ქარმა ისიც გადააგდო კურსიდან.
დაშავებულების შესახებ ინფორმაცია არ გავრცელებულა.
წყარო: bbc
მოამზადა: ანა სიბოშვილმა