"მითხრეს, წინა წყვილს ბევრი ფანი ჰყავდა და უარყოფით რაღაცებს უნდა ელოდოო... ვერც წარმოვიდგენდი, რა მელოდა" - ნანუკა სტამბოლიშვილი ფსიქოლოგიურ ომზე

ნანუკა სტამბოლიშვილი, პროფესიით ეკონომისტი ქალი, რომლის ცხოვრებაც ერთ დღეში რადიკალურად შეიცვალა, დღეს თურქული სერიალების ვარსკვლავია. თუმცა, წარმატებისკენ მიმავალი გზა ვარდისფერი ფერებით სულაც არ ყოფილა მოფენილი. მსახიობმა „აჭარის მაუწყებელთან“ პირველად ისაუბრა იმ უმძიმეს ფსიქოლოგიურ წნეხსა და "სოციალურ ომზე“, რომელიც მას თურქეთში ჩასვლისთანავე დაატყდა თავს.

გაფრთხილება, რომელიც რეალობას არ დაემთხვა

ნანუკა იხსენებს, რომ როდესაც Emanet-ის მესამე სეზონში მთავარ როლზე დაამტკიცეს, გადასაღებ მოედანზე პოზიტიურად გააფრთხილეს: წინა მსახიობსა და მის წყვილს ძალიან ბევრი გულშემატკივარი ჰყავდა, ამიტომ შესაძლოა, მაყურებლის ნაწილისგან მცირე უარყოფითი რეაქცია წამოსულიყო.

"მითხრეს, რომ რადგან მესამე სეზონში შემოვდიოდი და წინა წყვილს ბევრი ფანი ჰყავდა, ცოტა უარყოფით რაღაცებს უნდა ელოდოო. ვიფიქრე, რა უნდა მომხდარიყო - ერთი, ორი, ათი თუ ორმოცდაათი კომენტარი? ვერც კი წარმოვიდგენდი, რა მელოდა,“ - ამბობს ნანუკა.

ომი სოციალურ ქსელებში

როგორც კი ინფორმაციამ გაჟონა, ნანუკას წინააღმდეგ ნამდვილი კამპანია დაიწყო. განსაკუთრებული აგრესია Instagram-სა და Twitter-ზე მოდიოდა, ძირითადად იმ უცხოელი მაყურებლებისგან, სადაც ეს სერიალი იყიდება.

ნანუკა იხსენებს, რომ ეს იყო წარმოუდგენელი სტრესი, რომელსაც ფსიქოლოგიურად ძლიერი ადამიანის გარდა, ვერავინ გაუძლებდა. მის შესახებ ისეთ ისტორიებს იგონებდნენ, რისი წარმოდგენაც კი შეუძლებელი იყო.

"ისეთ რაღაცებს იგონებდნენ, ვფიქრობდი, საიდან მოუვიდათ ეს აზრი-მეთქი. ენა არ ვიცოდი, ამ სფეროში გამოუცდელი ვიყავი და უცებ ამხელა ჰეითს შევეჯახე. არ ვიცოდი, რაზე მენერვიულა - დაკისრებულ პასუხისმგებლობაზე, საქმეზე თუ ამ თავდასხმებზე. მქონდა შეგრძნება, თითქოს ცხვარი მოხვდა მგლების ხროვაში,“ - იხსენებს მსახიობი.

ქართველი გულშემატკივრების „არმია“

მიუხედავად იმისა, რომ შინაგანად ძალიან განიცდიდა, ნანუკა ამას არ იმჩნევდა. მისი თქმით, მას სიმტკიცის შენარჩუნებაში მისი ზოდიაქოს ნიშანი (კურო) და სიჯიუტე დაეხმარა. თუმცა, ყველაზე დიდი ძალა ქართველმა ხალხმა მისცა.

როდესაც ნანუკას ყველაზე მეტად უჭირდა, მან დაინახა, რომ მის ზურგს უკან უზარმაზარი მხარდაჭერა იდგა.

„ცრემლები მადგება ამაზე საუბრისას. როცა მოვიხედე, დავინახე, რომ უკან მთელი ქართველების არმია მედგა. პირველივე დღეებიდან გვერდში დამიდგნენ და ეს ჩემთვის ყველაფერი იყო.“