ჩემპიონის მორიგი გამოწვევა: სასამართლო პროცესი იწყება - რატომ დაიბარეს ილია თოფურია მადრიდში?
UFC-ის ჩემპიონი ილია თოფურია სერიოზული სამართლებრივი გამოწვევის წინაშეა. გამოცემა El Mundo-ს ინფორმაციით, სპორტსმენი 7 იანვარს მადრიდში, მოსტოლესის ქალთა მიმართ ძალადობის სპეციალიზებულ სასამართლოში უნდა გამოცხადდეს.
ბრალდებები და დაცვის პროგრამა
დავის ინიციატორი ილიას ყოფილი მეუღლე, ჯორჯინა უზკატეგუია, რომელიც მათი წელიწადნახევრის ქალიშვილის დედაა. ჯორჯინამ ოფიციალური საჩივარი შეიტანა, სადაც ჩემპიონს შემდეგ მუხლებში სდებს ბრალს:
- ოჯახური და გენდერული ძალადობა;
- ფიზიკური დაზიანებების მიყენება;
- ოჯახური სასტიკი მოპყრობა.
აღსანიშნავია, რომ ჯორჯინა ამჟამად იმყოფება დაცვის სპეციალურ პროგრამაში, რაც იმას ნიშნავს, რომ სახელმწიფომ მის მიმართ გარკვეული საფრთხე დაინახა და უსაფრთხოების ზომები გაამკაცრა.
რას გადაწყვეტს სასამართლო პირველ ეტაპზე?
მიუხედავად მძიმე ბრალდებებისა, 7 იანვრის სხდომა არ იქნება ორიენტირებული იმაზე, არის თუ არა ილია დამნაშავე. ამ ეტაპზე სასამართლოს მთავარი ამოცანაა:
- ბავშვის სამართლებრივი სტატუსისა და უსაფრთხოების განსაზღვრა.
- დროებითი დამცავი ზომების მიღება.
- მშობლის უფლებების რეგულირება დავის დასრულებამდე.
- ილია თოფურიას პასუხი: „ეს არის შანტაჟი ფულის სანაცვლოდ“
სპორტსმენმა ჯერ კიდევ 15 დეკემბერს გააკეთა ემოციური განცხადება, სადაც აღნიშნა, რომ სწორედ ამ „გაუსაძლისი პირადი წნეხის“ გამო ვერ შეძლო 2026 წლის დასაწყისში ბრძოლის გამართვა და ტიტულის დაცვა.
თოფურია კატეგორიულად უარყოფს ბრალდებებს და აცხადებს, რომ მას აშანტაჟებენ:
"ბოლო თვეების განმავლობაში მიწევდა გაუსაძლის სიტუაციებთან გამკლავება. მემუქრებოდნენ, რომ გაავრცელებდნენ ძალადობის შესახებ ცრუ ბრალდებებს, თუ მათ გარკვეულ თანხას არ გადავუხდიდი. სიმართლეს მხოლოდ ერთი გზა აქვს – ფაქტები.“
ჩემპიონის თქმით, მას აქვს სრული დოკუმენტაცია – აუდიოჩანაწერები, მიმოწერები, მოწმეების ჩვენებები და ვიდეოები, რომლებიც ამტკიცებს არა მხოლოდ მის უდანაშაულობას, არამედ მის წინააღმდეგ მიმართულ დანაშაულებრივ ქმედებებს: ფულის გამოძალვას, მტკიცებულებების გაყალბებასა და პირადი ნივთების ქურდობას.
კონფლიქტის მიზეზი: განქორწინება თუ ძალადობა?
ილიას გარემოცვა დარწმუნებულია, რომ საქმე გაცილებით მარტივადაა: „ყველაფერი მას შემდეგ დაიწყო, რაც ილიამ განქორწინება მოითხოვა. ამ ბრალდებებს არავითარი საფუძველი არ აქვს.“ თავად სპორტსმენი კი ამბობს, რომ აქამდე დუმდა შვილების დასაცავად, თუმცა მიხვდა, რომ დუმილი სიცრუის ზრდას უწყობს ხელს.
"მე უნდა გადავდგა ეს ნაბიჯი და ვიყო მაგალითი იმისა, რომ არავინ უნდა დანებდეს შანტაჟს, მანიპულაციასა და შიშს,“ – დასძინა თოფურიამ.
წაიკითხეთ ასევე: